قىسقى ازيا ويىندارى: قازاقستان قۇراماسىنىڭ مەدالدار سانى 13 كە جەتتى
حاربين. KAZINFORM - قازاقستان سپورتشىلارى بۇگىن قىتايدىڭ حاربين قالاسىندا ءوتىپ جاتقان Ⅸ قىسقى ازيا ويىندارىندا ءتورت مەدال ەنشىلەدى.
ناقتىراق ايتساق، اردانا ماحانوۆا جانە ايانا جولداس فريستايل- اكروباتيكادان ايەلدەر اراسىندا سينحروندى سەكىرۋ سىنىندا 59.16 ۇپاي جيناپ، ءۇشىنشى ورىننان كورىندى. بۇل - قازاقستان دەلەگاتسياسىنىڭ حاربين قىسقى ازيا ويىندارىنداعى ونىنشى جۇلدەسى.
قازاقستاندىق سپورتشىلار شەرزود حاشيربايەۆ جانە رومان يۆانوۆ فريستايل-اكروباتيكادان ەرلەر اراسىندا سينحروندى سەكىرۋ سىنىندا 97.92 ۇپاي جيناپ، ەل قورجىنىنا ەكىنشى التىن مەدال سىيلادى.
ەرلەر اراسىندا بياتلوننان 10 شاقىرىم سپرينت دوداسىندا قازاقستاندىق ۆلاديسلاۆ كيرەيەۆ جانە ۆاديم كۋرالەس ەل قورجىنىن ءبىر التىن جانە ءبىر كۇمىس مەدالمەن تولىقتىردى.
وسىلايشا، قازاقستان دەلەگاتسياسىنىڭ مەدالدار سانى 13 كە (3 التىن، 6 كۇمىس جانە 4 قولا) جەتىپ، جالپى ەسەپتە 4-ورىندا كەلە جاتىر.
وسىعان دەيىن حابارلاعانىمىزداي، كونكيمەن جۇگىرۋدەن قىتاي قۇراماسىنىڭ مۇشەسى، قىتايدا تۋىپ-وسكەن ەتنيكالىق قازاق سپورتشى اقنار اداق قىزى حاربيندە ءوتىپ جاتقان Ⅸ قىسقى ازيا ويىندارىنىڭ التىن مەدال يەگەرى بولدى.
اۆتور
مۇحتار قاليموللا ۇلى
