قىسقى ازيا ويىندارى حاربيندە سالتاناتتى تۇردە اشىلدى
حاربين. KAZINFORM - قىتايدىڭ حاربين قالاسىندا ءوتىپ جاتقان IX قىسقى ازيا ويىندارىنىڭ سالتاناتتى اشىلۋ شاراسى جەرشىلىكتى ۋاقىت بويىنشا 7-اقپان كۇنى ساعات 20:00 دە رەسمي تۇردە باستالدى.
سالتاناتتى شاراعا قىتاي حالىق رەسپۋبليكاسىنىڭ ءتوراعاسى شي جينپيڭ، قىرعىزستان پرەزيدەنتى سادىر جاپاروۆ، پاكىستان پرەزيدەنتى اسيف الي زارداري، تايلاند پرەمەر-ءمينيسترى پحەتحونگتحان چيناۆات، كورەيا ۇلتتىق اسسامبلەيا سپيكەرى ۋ ۆون سيك، حالىقارالىق وليمپيادا كوميتەتىنىڭ (ح و ك) پرەزيدەنتى توماس باح جانە ازيا وليمپيادالىق كەڭەسىنىڭ (ا و ك) ءبىرىنشى ۆيتسە-پرەزيدەنتى تيموتي فولك يانگ- تينگ قاتىستى.
سپورتشىلاردىڭ ستاديونعا كىرۋ ءراسىمى شامامەن 50 مينۋتقا سوزىلادى. قازاقستان دەلەگاتسياسى الاڭعا 12-بولىپ كىردى. حوككەيشى ءادىل بەكەتايەۆ جانە شورت-ترەكشى ولگا تيحونوۆا قازاقستان قۇراماسىنىڭ تۋىن ۇستاپ شىقتى.
وسىدان كەيىن، قىسقى ازيا ويىندارىن ۇيىمداستىرۋ كوميتەتى باس حاتشىسىنىڭ ورىنباسارى، اتقارۋشى كوميتەت ديرەكتورىنىڭ ورىنباسارى جانە حاربين قالالىق حالىق ۇكىمەتى اكىمىنىڭ ورىنباسارى چجان حايحۋا مەن ا و ك ءبىرىنشى ۆيتسە-پرەزيدەنتى تيموتي فولك يانگ-تينگ ءسوز سويلەدى. قىتاي ءتوراعاسى شي جينپيڭ اشىلۋ سالتاناتى اشىق دەپ جاريالادى.
ايتا كەتەيىك، قىسقى ازياداعا قازاقستاننان 137 سپورتشى قاتىسادى. جارىستار حاربين قالاسىندا جانە يابۋلي تاۋ شاڭعى كۋرورتىندا وتەدى.
سونداي- اق، دوداعا ازيانىڭ 34 ەلىنەن/ايماقتارىنان بارلىعى 1275 سپورتشى (755 ەر، 520 ايەل) قاتىسىپ، رەكوردتىق كورسەتكىشكە جەتتى.
مۇحتار قاليموللا ۇلى
