قىرىلعان يتبالىقتار بويىنشا زەرتتەۋ قورىتىندىسى وسى ايدا جاريالانادى
اقتاۋ. KAZINFORM - بۇل تۋرالى گيدروبيولوگيا جانە ەكولوگيا ينستيتۋتى حابارلادى.
- قازىر زەرتتەۋ جۇمىستارى بويىنشا كامەرالدىق وڭدەۋ جۇرگىزىلىپ جاتىر. اقپان ايىنىڭ ەكىنشى جارتىسىندا بارلىق قۇجات اۋىل شارۋاشىلىعى مينيسترلىگى بالىق شارۋاشىلىعى كوميتەتىنە تاپسىرىلادى، - دەلىنگەن حابارلامادا.
ەسكە سالايىق، ماڭعىستاۋدا قازان-قاراشا ايلارىندا يتبالىقتار جاپپاي قىرىلىپ قالعان ەدى. كاسپي تەڭىزىنىڭ اسىرەسە ءتۇپقاراعان اۋدانى اۋماعىنان 2 مىڭعا جۋىق ولەكسە تابىلدى.
ولگەن يتبالىقتاردان ۆيرۋسولوگيا جانە ەكولوگيا ينستيتۋتى مەن گيدروبيولوگيا جانە ەكولوگيا ينستيتۋتىنىڭ ماماندارى سىناما العان بولاتىن. ەكولوگيا جانە تابيعي رەسۋرستار ءمينيسترى يتبالىقتاردىڭ قىرىلۋ سەبەبىن ناقتىلاۋعا 3-4 اي ۋاقىت كەرەك ەكەنىن ايتتى.
بۇعان دەيىن كاسپيدەگى يتبالىقتىڭ جاپپاي قىرىلۋىنىڭ الدىن الا سەبەبى ايتىلعان ەدى.
سونداي-اق ماڭعىستاۋدا تەرىلمەي قالعان يتبالىق ولەكسەلەرىن قاسقىر جەپ جاتقانىن دا جازعان بولاتىنبىز.
