قىرقىنان شىعارۋ: نەگە ۇلدى 41-كۇنى، قىزدى 39-كۇنى شىعارادى؟
استانا. قازاقپارات - قازاقستاندىق ەتنوگراف عالىم بولات بوپاي ۇلى Baribar.kz تىلشىسىنە نەگە قىز بالا مەن ۇل بالانىڭ قىرقىنان شىعارۋ مەرزىمى ءارتۇرلى بولاتىنىن ءتۇسىندىرىپ بەردى.
بولات بوپاي ۇلىنىڭ ايتۋىنشا، بالانى قىرقىنان شىعارۋ قازاق حالقى ءۇشىن وتە ماڭىزدى. قىرقىنان شىعارعاندا بالانى قىرىق ايەل لەگەنگە سۋ تولتىرىپ، التىن، كۇمىس بۇيىمداردى سالىپ، بالانىڭ ۇستىنە قاسىقپەن سۋ قۇيىپ، جۋىندىرادى. قىرقىنان شىعارعاندا بالانىڭ تىرناعىن، قارىن شاشىن تانىمال، ءبىلىمدى ادامدارعا العىزعان. الىنعان تىرناق پەن شاشتى تاستاي سالماي، ءشيدىڭ نەمەسە بايتەرەكتىڭ تۇبىنە كومگەن.
ماماننىڭ ايتۋىنشا، ۇل بالانى قىرقىنان اسىرىپ، 41-كۇنى قىرقىنان شىعارسا، قىزدى 39-كۇنى شىعارادى. سەبەبى انانىڭ قۇرساعىندا قىز توعىز اي، توعىز كۇن جاتادى، ال ۇل توعىز اي ون ەكى كۇن، ياعني ءۇش كۇن ارتىق جاتادى. سوندىقتان قىزدىڭ باليعات جاسى توعىز جاس بولادى، ۇلدىڭ باليعات جاسى - 12 جاس.
عىلىمدا دا ۇل بالا 40 كۇنگە دەيىن ەكى دۇنيەنىڭ ورتاسىندا جاتادى ەكەن. ونىڭ ەستۋ قابىلەتى، ءوزى ءالسىز بولادى. كوزى دۇرىس كورمەي، تولىق اشىلمايدى، موينى بوس بولادى، ەڭبەگى قاتپايدى، ال سۇيەگى وتە جۇمساق بولادى. بالا 40 كۇننىڭ ىشىندە تولىق قالىپتاسادى. وعان قوسا اناسى سول ۋاقىتتا ءال جيناپ، قول-اياعىن باۋىرىنا الادى.
ايتا كەتەيىك، بالا 40 كۇن بويى يتكويلەك كيەدى. يتكويلەك دەگەنىمىز - جاڭا تۋعان نارەستەگە ارناپ تىگىلگەن قىرقىنان شىققانشا كيەتىن عۇرىپتىق كويلەك. يتكويلەك شەشكەننەن كەيىن ونى اتا-اناسى تۇمار رەتىندە ساقتاپ قوياتىن. ەر ادامدار بالاسىنىڭ يتكويلەگىن كوبىنە جاۋعا بارعاندا تۇمار رەتىندە قوينىنا سالاتىن.
