قىرعىزستاننىڭ بۇرىنعى پرەزيدەنتى المازبەك اتامبايەۆ 11 جىلعا سوتتالۋى مۇمكىن
استانا. KAZINFORM - بىشكەكتە 2019-جىلدىڭ تامىزىنداعى قوي-تاش وقيعاسى بويىنشا سوت پروتسەسى جالعاسۋدا. ءىس بويىنشا ايىپتالۋشىلاردىڭ اراسىندا قىرعىزستاننىڭ بۇرىنعى پرەزيدەنتى المازبەك اتامبايەۆ، بۇرىنعى دەپۋتاتتار مەن ءبىرقاتار شەنەۋنىك بار، دەپ حابارلايدى Kazinform مەنشىكتى ءتىلشىسى.
بىشكەك جىلۋ ەلەكتر ورتالىعىنا كومىر جەتكىزۋ، جەر تەلىمىن زاڭسىز يەمدەنۋ بويىنشا قىلمىستىق ىستەر ءبىر وندىرىسكە بىرىكتىرىلگەنى حابارلاندى.
مەملەكەتتىك ايىپتاۋ ايىپتالۋشى تاراپتى كىنالى دەپ تانىپ، قىرعىز رەسپۋبليكاسىنىڭ بۇرىنعى پرەزيدەنتى المازبەك اتامبايەۆتى 11 جىلعا، ۇلتتىق قاۋىپسىزدىك مەملەكەتتىك كوميتەتىنىڭ توعىزىنشى قىزمەتىنىڭ بۇرىنعى قىزمەتكەرى قانات ساعىمبايەۆتى 11 جىلعا، جوگوركۋ كەنەشتىڭ بۇرىنعى دەپۋتاتى راۆشان جەەنبەكوۆتى، پرەزيدەنت اكىمشىلىگىنىڭ بۇرىنعى مۇشەسى فاريدا نيازوۆا جانە «سوتسيال دەموكراتتار» پارتياسىنىڭ مۇشەسى فارحات باابيەۆتى 10 جىلعا باس بوستاندىعىنان ايىرۋدى سۇرادى.
پروكۋرورلار اسەل كودۋرانوۆا، يرينا كارامۋشكينا، قۇندىز جولدۋبايەۆا جانە مەەربەك ميسكەنبايەۆقا ءۇش جىل سىناق مەرزىمىن سۇرادى.
ايتا كەتەيىك، 2019-جىلدىڭ 7-تامىزىندا بىشكەك ىرگەسىندەگى قوي-تاش اۋىلىندا قىرعىزستاننىڭ بۇرىنعى پرەزيدەنتى المازبەك اتامبايەۆتى ۇستاۋ بويىنشا ارنايى وپەراتسيا جۇرگىزىلگەن بولاتىن. رەسپۋبليكانىڭ بۇرىنعى پرەزيدەنتىنىڭ ۇيىندە اتىس بولعان. سالدارىنان قىرعىزستان دەنساۋلىق ساقتاۋ مينيسترلىگىنىڭ مالىمەتىنشە، ءتۇرلى جاراقاتتارمەن بىشكەكتەگى اۋرۋحانالار مەن شۋ وبلىستىق بىرىككەن اۋرۋحاناسىنا زارداپ شەككەن 45 ادام جاتقىزىلعان.
2019-جىلعى 8-تامىزدا ەل قاۋىپسىزدىك كەڭەسىنىڭ وتىرىسىندا قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ المازبەك اتامبايەۆ زاڭ اياسىندا جۇرگىزىلگەن تەرگەۋ شارالارىنا قارۋلى قارسىلىق كورسەتىپ، قىرعىز رەسپۋبليكاسىنىڭ كونستيتۋتسياسى مەن زاڭدارىن ورەسكەل بۇزدى دەپ مالىمدەدى.
سول كۇنى المازبەك اتامبايەۆتى ءتارتىپ ساقشىلارى ۇستادى. 9-تامىزدا ا. اتامبايەۆقا قاتىستى بۇلتارتپاۋ شاراسى تاڭدالدى - ول 26-تامىزعا دەيىن قاماۋعا الىندى. 2019-جىلدىڭ 7-8-تامىزىندا قوي-تاشتا بولعان وقيعا اياسىندا بۇرىنعى پرەزيدەنت المازبەك اتامبايەۆتىڭ سىبايلاستارىنا قاتىستى 8 قىلمىستىق ءىس قوزعالدى.
