قىرعىزستاندا 200 دەن استام مەملەكەتتىك قىزمەتكەر جۇمىستان بوساتىلدى
ق ر ۇلتتىق قاۋىپسىزدىك مەملەكەتتىك كوميتەتى وكىلى كامچىبەك تاشيەۆ كەميندەگى ۇ ق م ك باسقارماسىنىڭ جاڭا عيماراتىنىڭ اشىلۋىندا ءسوز سويلەپ، 202 شەنەۋنىك ۇيىمداسقان قىلمىستىق توپ پەن جەمقورلىققا قاتىسى بولعانى ءۇشىن جۇمىستان شىعارىلعانىن ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ارنايى قىزمەت باسشىسىنىڭ سوزىنشە، قازىرگى ۋاقىتتا شەكارا قىزمەتى ءتوراعاسىنىڭ بۇرىنعى ورىنباسارى رايمبەك ماترايموۆپەن بايلانىسى بار 92 مەملەكەتتىك قىزمەتكەر جانە كوزى جويىلعان قىلمىس الەمىنىڭ سەركەسى كامچى كولبايەۆپەن بايلانىسى بار 60 قىزمەتكەر، سونداي-اق شەكارا ورگانىنىڭ 50 جۇمىسشىسى قىزمەتىنەن بوساتىلدى.
«ۇيىمداسقان قىلمىستىق توپ مۇشەلەرى دەپۋتات بولىپ، اۋىلدىق، اۋداندىق اكىمشىلىك، مەملەكەتتىك ورگان مەن مينيسترلىكتە جۇمىس ىستەي المايدى. ءبىزدىڭ مىندەت - ولاردى جاۋاپقا تارتۋ. ەگەر رايمبەك ماترايموۆ قىرعىزستاندا تۇرعىسى كەلسە، شاعىن «Daewoo Matiz» كولىگىمەن ءجۇرۋى كەرەك. ونىڭ قىلمىستىق جولمەن تاپقان بايلىعى مەملەكەت دامۋىنا كەدەرگى كەلتىرمەۋى ءتيىس جانە ەلدىڭ ىشكى جۇمىسىنا ارالاسپاۋى قاجەت. بۇرىن كوپتەگەن سايلاۋدا، مەملەكەت ىستەرىندە شەنەۋنىكتەر اقشا ءۇشىن ولارعا قىزمەت ەتكەنىن، ونىڭ ىشىندە ۇقمك وكىلدەرى دە بولعانىن بىلەسىزدەر. اقشاعا ساتىلاتىن قىزمەتكەرلەر بولعان. ەندى ەلىمىزدە كولبايەۆ، ماترايموۆ جانە باسقا دا مافيا بولمايتىنىن تاعى اتاپ وتكىم كەلەدى. مەملەكەتىمىزدە زاڭ مەن تۇراقتىلىق بولۋى قاجەت. ەلدە ادال جولمەن اقشا تاباتىن قاراپايىم ادامدار، ادال كاسىپكەرلەر مەن ەلگە ادال قىزمەت ەتىپ جۇرگەندەر جاقسى ءومىر ءسۇرۋى ءتيىس، - دەدى ق ر ۇ ق م ك ءتوراعاسى.
