قىرعىزستان تۋىنا وزگەرىس ەنگىزەدى
جوگوركۋ كەنەش ءتوراعاسى نۋرلانبەك شاكيەۆ مەملەكەتتىك تۋ اۆتورلارى جۋسۋپ ماتايەۆ پەن بەكبوسۋن جايچىبەكوۆپەن، سونىمەن قاتار مەملەكەت جانە قوعام قايراتكەرى مەدەتكان شەريمكۋلوۆپەن كەزدەسىپ،مەملەكەتتىڭ نەگىزگى سيمۆولىن وزگەرتۋگە قاتىستى ۇسىنىستارىن تىڭدادى، دەپ حابارلادى پارلامەنتتىڭ باسپا ءسوز قىزمەتى.
Kazinform بۇل تۋرالى كابار اگەنتتىگىنە سىلتەمە جاساپ جازدى.
باسپاءسوز قىزمەتىنىڭ اقپاراتى بويىنشا، نۋرلانبەك شاكيەۆ مەملەكەتتىك تۋعا قاتىستى ءتۇرلى پىكىر بار ەكەنىن اتاپ وتكەن. سونىمەن قاتار ول الۋان كوزقاراستى ەسكەرە وتىرىپ دەپۋتات ۋلان پريموۆپەن بىرلەسىپ تۋدىڭ كەي ەلەمەنتتەرىن ناقتىلاۋ تۋرالى زاڭ جوباسىن دايىندايتىنىن اتاپ ءوتتى.
«ۇلتتىق تۋ - نەگىزگى سيمۆولدارىمىزدىڭ ءبىرى. ونى قىرعىزستان اتىنان بەدەلدى حالىقارالىق جارىستارعا شىعىپ، ەل نامىسىن قورعايتىن سپورتشىلارىمىز، دارىندى وتانداستارىمىز كوتەرەدى. سول سەبەپتى ءبىز وعان ۇقىپتى قاراپ، تالقىلاۋعا جول بەرمەۋىمىز كەرەك»، - دەپ تولىقتىردى ءتوراعا.
ول مەملەكەتتىك تۋ اۆتورلارى مەن قوعام پىكىرى تۋ ەلەمەنتتەرىن بەكىتۋدە ماڭىزدى رولگە يە ەكەنىن اتاپ ءوتتى.
مەدەتكان شەريمكۋلوۆ، بەكبوسۋن جايچىبەكوۆ جانە جۋسۋپ ماتايەۆ 10 كۇن ىشىندە وسى ماسەلەنى قاراپ، تۋدىڭ ناقتى نۇسقاسىن ەنگىزەتىنىن حابارلادى. نۋرلانبەك شاكيەۆ زاڭ جوباسىنىڭ باستاماشىلارى نەگىزگى كونتسەپتسيادان ۇزاماي، تۋدىڭ جاڭارعان نۇسقاسى قابىلداناتىن كەزدە اۆتورلار مەن قوعام پىكىرىن ەسكەرەدى دەپ سەندىردى.
قىرعىز رەسپۋبليكاسىنىڭ مەملەكەتتىك سيمۆولىنا وزگەرىس ەنگىزۋ تۋرالى ۇسىنىس تاستاعان - سپيكەر نۋرلانبەك شاكيەۆ پەن دەپۋتات ۋلان پريموۆ. ولاردىڭ سوزىنشە، قازىر تۋدىڭ ورتاسىنداعى كۇن ساۋلەسى مەن تۇندىك تۇرلىشە قابىلدانادى. بىرەۋلەر ونى كۇنباعىسقا ۇقساتسا، ەندى ءبىرى كيىز ءۇي بولىگى رەتىندە كورەدى.
«تۋدىڭ سۋرەتىنە دەگەن ءتۇرلى كوزقاراستى بولدىرماۋ شارالارىن قابىلداۋ قاجەت. وسىعان بايلانىستى قىرعىز تۋىنداعى تولقىن تارىزدەس ساۋلەنى ناقتى كۇن ساۋلەسىن بەينەلەيتىن ۇلگىگە اۋىستىرۋ ۇسىنىلدى»، - دەلىنگەن ءتۇسىندىرۋ انىقتامالىعىندا.
