قىرعىزستان پرەزيدەنتى جۋرناليستەردىڭ جاپپاي ۇستالۋىنا قاتىستى پىكىر ءبىلدىردى
قىرعىزستاندا ءسوز بوستاندىعى بولعان، بار جانە بولادى. ارينە، ب ا ق سالاسىن رەتتەيتىن زاڭداردى، ەڭ الدىمەن ۇلتتىق قاۋىپسىزدىكتى ساقتاۋ كەرەك.
بۇل تۋرالى جاقىندا ينتەرنەت-رەداكسيالار تىلشىلەرىنىڭ جاپپاي ۇستالۋىنا قاتىستى پىكىر بىلدىرگەن قىرعىزستان پرەزيدەنتى سادىر جاپاروۆ «كابار» اقپارات اگەنتتىگىنە بەرگەن سۇحباتىندا ايتتى.
سادىر جاپاروۆ ەلدە ءسوز بوستاندىعىن شەكتەۋ نەمەسە قىسىم كورسەتۋ ارەكەتتەرىنىڭ جوقتىعىن باسا ايتتى.
ونىڭ پىكىرىنشە، ب ا ق سالاسىن رەتتەيتىن زاڭداردى جانە ەڭ الدىمەن ۇلتتىق قاۋىپسىزدىكتى ساقتاۋ قاجەت.
«بۇگىندە قوعامدىق پىكىردى ءداستۇرلى جۋرناليستيكامەن باسەكەلەسەتىن الەۋمەتتىك جەلىلەر ارقىلى قالىپتاستىرۋ ۇيرەنشىكتى جاعدايعا اينالدى. مۇنداي جاعدايدا جۋرناليست بولسىن، بلوگەر بولسىن، ءاربىر ازامات قوعامعا پايداسىن تيگىزۋمەن قاتار، ءاربىر تاراتقان ءسوزى ءۇشىن جاۋاپتى ەكەنىن ءتۇسىنۋى كەرەك. ءبىز ساپالى جۋرناليستىك زەرتتەۋدى قولدايمىز. ءبىراق كوپ جاعدايدا بلوگەرلەر فاكتىلەردى بۇرمالاپ، تۇيمەدەيدى تۇيەدەي ەتەدى، ايلا-شارعى جاساپ، قوعامدى اداستىرۋمەن اينالىسادى. ولاردىڭ ماتەريالدارى بولجالمەن ەمەس، فاكتىلەرمەن دالەلدەنۋى كەرەك، ولار قاۋەسەت ەمەس، اقپارات الىپ ءجۇرۋى كەرەك»، - دەدى س. جاپاروۆ.
ول سونداي-اق بۇگىنگى اۋمالى-توكپەلى زاماندا ءسوز بوستاندىعى جاۋاپكەرشىلىكپەن قاتار جۇرەتىنىن ايتتى.
ونىڭ سوزىنشە، قازىردىڭ وزىندە دامىعان دەموكراتيالىق ەلدەر ءسوز بوستاندىعىن ساياسي ماقساتتارعا قول جەتكىزۋ ءۇشىن پايدالانىپ، قوعامدى تۇراقسىزداندىرۋشىلارعا قاتىستى شەكتەۋلەر ەنگىزىپ جاتىر.
«وسىعان بايلانىستى ءبىز الدىن الۋ شارالارىن قابىلداۋعا ءماجبۇرمىز، ويتكەنى بۇل ەلدىڭ ۇلتتىق قاۋىپسىزدىگىنە تىكەلەي قاتىستى»، - دەدى س. جاپاروۆ.
ۇستالعاندارعا قاتىستى جاعدايعا توقتالعان مەملەكەت باسشىسى قاماۋعا الىنعان 11 ادام كاسىبي جۋرناليست ەمەس، الەۋمەتتىك جەلىلەردى پايدالانىپ، ءتۇرلى اقپارات، سونىڭ ىشىندە ەلدىڭ ۇلتتىق قاۋىپسىزدىگىنە قاتەر توندىرەتىن اقپاراتتى جاۋاپسىز جاريالايتىن بلوگەر ەكەنىن اتاپ ءوتتى.
«كەز كەلگەن قۇقىقتىق مەملەكەتتەگىدەي قىرعىز رەسپۋبليكاسىندا زاڭ الدىندا جاۋاپكەرشىلىك بار. وسىعان وراي، اقپاراتتىڭ سەنىمدىلىگى ءۇشىن ءاربىر ادام، ەڭ الدىمەن ءوزىن جۋرناليست، بلوگەر سانايتىندار جاۋاپتى بولۋى كەرەك. جەكەلەگەن بلوگەرلەر مەن بەلسەندىلەردىڭ اشىق وتىرىك، جالعان اقپارات تاراتقانىنا تالاي رەت كۋا بولدىق. ايماقتىق، ءدىني جانە ۇلتتىق ارازدىقتى ادەيى نەمەسە بىلمەي قوزدىرۋ، سونداي-اق كونستيتۋتسياعا قايشى جانە تارتىپسىزدىكتەرگە شاقىرۋ ارەكەتتەرى ءجيى بولدى»، - دەدى ول.
سادىر جاپاروۆتىڭ حابارلاۋىنشا، kloop.media، «ەدياحاب»، kaktus.media، «پوليتكلينيكا»، factcheck.kg، T- Media جانە باسقا دا ءبىرقاتار اقپارات اگەنتتىگى جىل سايىن شەتەلدىك دونورلاردان 600 مىڭ ا ق ش دوللارىنان استام گرانت، ياعني قاراجات الادى.
ونىڭ ايتۋىنشا، جالپى العاندا، 2017-2020-جىلدار ارالىعىندا دەموكراتيانى قولداۋ ۇلتتىق قورى قىرعىز ۇكىمەتتىك ەمەس ۇيىمدارىنىڭ وكىلدەرىنە، جۋرناليستەر مەن بلوگەرلەرگە 8471614 دوللار اۋدارعان.
«بۇل گرانت ءسوز بوستاندىعى، ب ا ق- قا قولداۋ كورسەتۋ، تاۋەلسىز جۋرناليستيكانى دامىتۋ جوبالارى اياسىندا ءبولىنىپ وتىرعانىن تۇسىنەمىز. الايدا ءىس جۇزىندە ءتيىستى گرانتتىق قاراجات ءوز ماقساتىنا يگەرىلمەي جاتىر. ۇكىمەتتى، مەملەكەتتىك ساياساتتى قارالاۋ، قوعامدى ۇگىتتەۋ، كونستيتۋتسياعا قارسى ۇندەۋ جاساۋ، جالپىۇلتتىق قاۋىپسىزدىككە قاتەر توندىرەتىن جالعان اقپارات تاراتۋ ساياساتى جۇرگىزىلۋدە»، - دەپ ءتۇسىندىردى پرەزيدەنت.
سادىر جاپاروۆ قوعامداعى پىكىر پليۋراليزمىن جاقتاپ، مەملەكەتتىڭ ىدىراۋىنا، ياعني جاۋاپكەرشىلىكسىز بوستاندىققا قارسى ەكەنىن ايتتى.
ونىڭ پىكىرىنشە، بوستاندىق قىرعىزستاننىڭ مۇددەسىن قورعاۋى كەرەك.
ەسكە سالا كەتسەك، 17- قاڭتاردا بىشكەكتە ءبىرىنشى ماي اۋداندىق سوتىنىڭ تەرگەۋ سۋدياسى شەشىم شىعارىپ، 11 ب ا ق وكىلىن ەكى ايعا قامادى. ولار ەل استاناسىنداعى 1№ تەرگەۋ يزولياتورىندا بولادى.
