قىرعىزستان رەسەيگە ءوز ميگرانتتارىنىڭ ماسەلەلەرى بويىنشا نوتا بەردى
استانا. KAZINFORM - قىرعىزستان س ءى م رەسەي زاڭناماسىنداعى وزگەرىستەر جاعدايىندا رەسەيدەگى قىرعىزستاندىقتاردىڭ قۇقىقتىق جاعدايىن تالقىلادى، دەپ حابارلايدى kazinform اگەنتتىگىنىڭ مەنشىكتى ءتىلشىسى.
19-اقپاندا بىشكەكتە قىرعىزستان سىرتقى ىستەر ءمينيسترىنىڭ ورىنباسارى الماز يمانعازيەۆ رەسەيدىڭ قىرعىزستانداعى ەلشىسى سەرگەي ۆاكۋنوۆپەن كەزدەستى.
قىرعىز تاراپى شەتەلدىك ازاماتتاردىڭ رەسەي فەدەراتسياسىنا كىرۋىنىڭ جاڭا ەرەجەلەرى مەن شارتتارىن ەنگىزۋگە، اتاپ ايتقاندا، ەلگە كىرۋ جانە ەلدە بولۋى ءۇشىن الدىن الا تىركەۋ جانە ءوتىنىش بەرۋ مەحانيزمىنە، سونداي-اق ولاردىڭ رەسەيدە ۋاقىتشا بولۋ مەرزىمىن ازايتۋعا بايلانىستى ماسەلەلەرگە نازار اۋداردى، دەپ حابارلايدى قىرعىزستاندىق س ءى م.
بۇل وزگەرىستەر قىرعىزستاننىڭ ەڭبەك ازاماتتارى مەن ولاردىڭ وتباسى مۇشەلەرىنىڭ قوزعالىس ەركىندىگىنە، سونداي-اق ولاردىڭ رەسەي فەدەراتسياسىنداعى ەڭبەك قىزمەتىنە قولجەتىمدىلىگىنە تەرىس اسەر ەتۋى مۇمكىن ەكەندىگى اتالىپ ءوتتى.
سونداي-اق، شەتەل ازاماتتارىنىڭ بالالارىنا، ونىڭ ىشىندە قىرعىزستان ازاماتتارىنا رەسەيدىڭ جالپى ءبىلىم بەرۋ ۇيىمدارىنا قابىلداۋ كەزىندە ورىس ءتىلىن بىلۋگە ارنالعان تەستىلەۋدەن وتۋگە جاڭا تالاپتاردى ەنگىزۋگە ەرەكشە نازار اۋدارىلدى.
- قىرعىز تاراپى رەسەي تاراپىنىڭ نازارىن رەسەيگە كىرۋ كەزىندەگى قىرعىز ازاماتتارىنىڭ جالعاسىپ جاتقان قيىندىقتارىنا جانە ولاردى رەسەي فەدەراتسياسىنا كوشى-قون ەسەبىنە قويۋداعى پروبلەمالارعا اۋداردى. كەزدەسۋ سوڭىندا قىرعىزستان مەن رەسەيدىڭ ەۋرازيالىق ەكونوميكالىق وداققا مۇشەلىگىن، سونداي-اق قىرعىز رەسپۋبليكاسىنداعى ورىس ءتىلىنىڭ مارتەبەسىن ەسكەرە وتىرىپ، اتالعان ماسەلەلەر بويىنشا قىرعىزستان نوتالارى رەسەي تاراپىنىڭ قاراۋىنا بەرىلدى، - دەلىنگەن حابارلامادا.
بۇعان دەيىن قىرعىزستان س ءى م ازاماتتارعا رەسەيگە كىرگەن كەزدە كۇشەيتىلگەن باقىلاۋعا دايىندالۋعا كەڭەس بەرگەنى حابارلانعان بولاتىن.
