قىرعىز پرەزيدەنتى يلون ماسكتىڭ «ازاتتىق» راديوسىن جابۋ تۋرالى باستاماسىن قولدادى

قىرعىز رەسپۋبليكاسىنىڭ باسشىسى دونالد ترامپ پەن يلون ماسك «اقشا اسپاننان تۇسپەيتىنىن» جاقسى تۇسىنەتىن ميللياردەرلەر ەكەنىن اتاپ ءوتتى.

- ولار امەريكالىقتاردىڭ اقشانى ماعىناسىز ىسىراپ ەتۋىن توقتاتقىسى كەلەدى. ولار مۇنى وتە دۇرىس جاساپ جاتىر. قازىر - XXI عاسىر. كەز كەلگەن اقپارات بەس مينۋت ىشىندە بۇكىل الەمگە تارالادى. وسىدان 20-30 جىل بۇرىن ينتەرنەت تە، سمارتفون دا بولماعاندىقتان، بارلىعى «ازاتتىقتى» تىڭداپ، سەنەتىن. قازىر حالىققا «ازاتتىق جاڭالىقتارى» كەرەك ەمەس، - دەدى ول.

سادىر جاپاروۆتىڭ ايتۋىنشا، قازىر ادامدار جاڭالىقتى سارالاي الادى، بارىنە سەنە بەرمەيدى، جالعان اقپاراتتى شىندىقتان ايىرا الادى.

- ماسەلەن، «ازاتتىق» بىرەۋدىڭ بەدەلىنە نۇقسان كەلتىرەتىن بۇرمالانعان اقپارات تاراتسا، ادامدار ونى تالداي باستايدى. ال اقپاراتتىڭ جالعان ەكەنى انىقتالعان كەزدە ونداي اقپاراتتى نە ءۇشىن تاراتتى دەگەن سۇراق تۋىندايدى. جاۋاپ رەتىندە ولاردان كەشىرىم سۇراپ، جاڭالىقتاردى سايتتان الىپ تاستايدى. ال «ازاتتىقتى» سوتقا بەرسەڭ قىرعىزستاندا ءسوز بوستاندىعى ولگەن دەپ جار سالادى. بۇل قالاي؟ جالعان اقپارات تاراتۋ نەمەسە جاڭالىقتاردى مانيپۋلياتسيالاۋ ءسوز بوستاندىعى ما سوندا؟ - دەيدى سادىر جاپاروۆ.

قىرعىزستان باسشىسى رۇقسات بەرۋدى ءسوز بوستاندىعىمەن نەمەسە ادام قۇقىقتارىمەن شاتاستىرماۋعا شاقىرىپ، ترامپ پەن ماسكتىڭ شەشىمدەرىن قولداۋ كەرەكتىگىن ايتتى.

بۇعان دەيىن يلون ماسكتىڭ «ازاتتىق» جانە «امەريكا داۋىسى» راديوسىن جابۋعا شاقىرعانى حابارلانعان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى