قوسىلعان قۇن سالىعى وسسە، پويىز جانە ۇشاق بيلەتتەرى قىمباتتاي ما

وسى ورايدا كولىك ۆيتسە-ءمينيسترى تالعات لاستايەۆتان اۋە جانە پويىز بيلەتتەرىنىڭ قۇنىنا قاتىستى ويىن بىلگەن ەدىك.

- تەمىرجول بيلەتتەرى قىمباتتامايدى، سەبەبى جولاۋشىلاردىڭ بيلەتىن سۋبسيديا ارقىلى رەتتەيمىز. سول سەبەپتى پويىز بيلەتتەرىنىڭ باعاسى باقىلاۋدا. اۋە بيلەتتەرىنە كەلسەك، ول دا قىمباتتامايدى، سەبەبى ديناميكالىق تاريف قولدانىلادى، ياعني بيلەتتى ەرتەرەك الساڭىز ارزان، ال رەيس جاقىنداعاندا الساڭىز سايكەسىنشە قىمباتقا تۇسەدى. سول سەبەپتەن قوسىلعان قۇن سالىعىنىڭ ءوسۋى قاتتى اسەر ەتپەيدى، - دەپ جاۋاپ بەردى تالعات لاستايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.

ۆيتسە- ءمينيستردىڭ ايتۋىنشا، ۇشاقتى ساتىپ العاندا قوسىلعان قۇن سالىعى ەسەپكە الىنادى.

- اۋە كومپانيالارى ۇشاقتى ساتىپ العاندا قوسىلعان قۇن سالىعىن جابادى، ول ءتاريفتىڭ باعاسىنا كوپ اسەر ەتپەيدى، - دەپ سەندىردى كولىك ءمينيسترىنىڭ ورىنباسارى.

سونداي-اق تالعات لاستايەۆ اتالعان ماسەلەنىڭ تالقىلانىپ جاتقانىن تىلگە تيەك ەتتى.

بۇعان دەيىن كولىك ۆيتسە-مينيسترىنەن پرەزيدەنتتىڭ اۆياكەروسين باعاسىن تۇراقتاندىرۋعا قاتىستى تاپسىرماسىنىڭ قالاي ورىندالىپ جاتقانى تۋرالى سۇراعان ەدىك.

ايتا كەتسەك، ەلىمىزدە جۇك تاسيتىن اۋە كومپانياسى اشىلۋى مۇمكىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى