قوستاناي جىلقى زاۋىتى كوكپار مەن اۋدارىسپاق اتتارىن سۇرىپتاۋعا كىرىسپەك
استانا. KAZINFORM - ەلورداداعى Qazaqstan جەڭىل اتلەتيكالىق سپورت كەشەنىندە ۇلتتىق سپورت جوعارى مەكتەبى ءبىر جىلدىق جۇمىسىن قورىتىندىلاعان جيىن وتكىزىپ جاتىر.
ءىس- شارانىڭ الدىندا ۇلتتىق سپورت قاۋىمداستىعىنىڭ ۆيتسە- پرەزيدەنتى تاستانبەك ەسەنتايەۆ كوكپار اتتارىن دايارلاۋ ماسەلەسى تۋرالى پىكىر ءبىلدىردى.
- اتتاردى دوپينگكە قارسى تەكسەرۋدى جولعا قويۋ ءۇشىن تۇركياداعى عىلىمي زەرتتەۋ لابوراتورياسىمەن كەلىسكەن بولاتىنبىز. ءبىراق كوشپەندىلەر ويىندارىنا دەيىن ىسكە اسىرىپ ۇلگەرمەدىك. دەگەنمەن الداعى جوسپارىمىزدىڭ ءبىرى بولىپ قالىپ وتىر.
- قازاقستانداعى جىلقى تۇقىمدارىنىڭ ىشىندە الەمگە ەڭ تانىمالى - قوستاناي جىلقىسى. بولاشاقتا وسى قوستاناي جىلقىسىن بۋدانداستىرۋ ارقىلى كوكپاردىڭ، اۋدارىسپاقتىڭ، تەڭگە ءىلۋدىڭ اتتارىن شىعارساق دەگەن جوسپارىمىز بار. قوستاناي زاۋىتى وسىنداي جوبا ۇسىنىپ ءجۇر. قازىر ءبىز مىقتى ات كەرەك بولسا قىرعىزستان مەن رەسەيدەن اكەلەمىز. بايگە اتتارىن دا تەك شەتەلدەن الىپ جاتىرمىز. ولاي بولماۋ كەرەك. وزىمىزدە بار جىلقىنىڭ تۇقىمىن دۇرىس پايدالانا الماي وتىرمىز، - دەيدى فەدەراتسيا وكىلى.
سونداي- اق ول ءبىر جىل بۇرىن قۇرىلعان ۇلتتىق سپورت جوعارى مەكتەبىنىڭ استانادا وتكەن دۇنيەجۇزىلىك كوشپەندىلەر ويىندارىنا دايىندىق كەزىندە كوپ كومەگى تيگەنىن ايتادى.
- سول مەكتەپ ارقىلى كەشەندى عىلىمي توپ قۇرىلدى. كوكپار، تەڭگە ءىلۋ، ساداق اتۋ، اۋدارىسپاق سياقتى سپورت تۇرلەرىنەن ويىندارعا قاتىساتىن سپورتشىلار مەن اتتاردى عىلىمي تۇرعىدا تەكسەرىپ، نۇسقاۋلار بەرگەن. سپورتشىلاردى دا ءدال سونداي تەكسەرۋدەن وتكىزىپ، عىلىمي سۇيەمەلدەۋ جاسادىق.
مىسالى، كوكپارعا ىرىكتەلگەن اتتاردىڭ فۋنكسيونالدىق دياگنوستيكاسىن جاسادى. ول كەزدە جاڭا ات ساتىپ الۋعا ۋاقىت تىعىز بولدى دا، قولدا بار اتتاردى ەمدەپ امالدادىق. اتتاردىڭ ازىق ءمازىرىن عىلىمي تۇرعىدا تۇزدىك. ونىڭ ءبارىن قالتقىسىز ورىنداۋعا كوبىنىڭ قارجىلىق تۇرعىدان، ينفراقۇرىلىم جاعىنان مۇمكىندىگى بولا بەرمەيدى. بۇگىن وسى كەدەرگىلەردى جويۋ ءۇشىن نە ىستەۋ كەرەكتىگىن تالقىلايمىز، - دەيدى فەدەراتسيا پرەزيدەنتىنىڭ ورىنباسارى.
ەسكە سالايىق، جۋىقتا عانا پرەزيدەنت تاپسىرماسى بويىنشا «قازاق جىلقى شارۋاشىلىعى جانە جەمشوپ ءوندىرۋ عىلىمي- زەرتتەۋ ينستيتۋتى» قۇرىلعان ەدى.
اۋىل شارۋاشىلىعى مينيسترلىگى وسى ينستيتۋتى ارقىلى 2035 -جىلعا دەيىن قولداعى جىلقىنىڭ گەنەتيكالىق الەۋەتىن سەلەكسيالىق، تەحنولوگيالىق ادىستەرمەن ارتتىرۋدى كوزدەپ وتىر.
