قوسشى قالاسىندا حالىقارالىق دەڭگەيدەگى كوللەدج اشىلادى
بۋراباي. KAZINFORM - استانانىڭ ىرگەسىندەگى قوسشى قالاسىندا حالىقارالىق دەڭگەيدەگى كوللەدج اشىلادى. ۇلتتىق قۇرىلتايدىڭ V وتىرىسىندا ۇكىمەتكە وسىنداي تاپسىرما بەرىلدى.
- ۇلتتىق قۇرىلتايدىڭ وتىرىستارىن ءار وبلىستا وتكىزۋدىڭ ۇتىمدى تۇسى بار. القالى جيىندا ايماقتىڭ دامۋىنا قاتىستى وزەكتى ماسەلەلەر دە قارالادى. مەنىڭ تاپسىرماممەن بۇگىنگى باسقوسۋعا اقمولا وبلىسىنىڭ ءبىر توپ ازاماتى قاتىسىپ وتىر. ولاردىڭ ىشىندە ارداگەرلەر، زيالى قاۋىم وكىلدەرى، قوعام بەلسەندىلەرى، كاسىپكەرلەر مەن جاستار بار.
مەن وسى ايماقتىڭ دامۋىنا ايرىقشا ءمان بەرەمىن. سوندىقتان اقمولا وبلىسىنداعى كەيبىر باستامالار مەن جوبالارعا نازار اۋدارعىم كەلەدى، - دەگەن مەملەكەت باسشىسى 2025 -جىل «جۇمىسشى ماماندىقتارى جىلى» دەپ جاريالانعانىن ەسكە سالدى.
- جاستاردىڭ زامان تالابىنا ساي ءبىلىم الۋىن قامتاماسىز ەتۋ ءۇشىن ۇكىمەت پەن وبلىس اكىمدىگى قوسشى قالاسىندا حالىقارالىق دەڭگەيدەگى كوللەدج اشۋعا كىرىسۋى قاجەت. قالانىڭ استانا ىرگەسىندە تۇرعانىن جانە تۇرعىندارىنىڭ سانى تەز ءوسىپ كەلە جاتقانىن ەسكەرسەك، بۇل - وتە وزەكتى ماسەلە، - دەدى قاسىم-جومارت توقايەۆ.
ايتا كەتۋ كەرەك، قۇرىلتايدىڭ پانەلدىك سەسسيالارى كەشە باستالعان. ول سەكسيالاردىڭ تاقىرىپتارى ازاماتتىق قوعام، مادەنيەت، ونەر، رۋحانيات، ءبىلىم جانە عىلىم، الەۋمەتتىك-ەكونوميكالىق دامۋ ماسەلەلەرىن قامتىدى.
اۆتور
ەسىمجان ناقتىباي
