قورعانىس مينيسترلىگى اسكەري قىزمەتشىلەر اراسىنداعى ءولىم-ءجىتىمنىڭ نەگىزگى سەبەبىن اتادى

«سوڭعى ءۇش جىلدا قارۋلى كۇشتەردە جارعىدان تىس قاتىناستاردان بولاتىن قىلمىستاردىڭ سانى 43 پايىزعا (40-تان 23-كە)، ال بيىل مەرزىمدى اسكەري قىزمەتشىلەر اراسىنداعى سۋيتسيد 67 پايىزعا (3-تەن 1-گە) تومەندەگەن. سىزدەر كەلتىرگەن 270 ءولىم-ءجىتىمنىڭ قارۋلى كۇشتەردە 140 وقيعاسى ورىن العان. ولارعا سىرقاتتانۋ، جول-كولىك وقيعالارى، سۋيتسيد، قاۋىپسىزدىك شارالارىن بۇزۋ جانە تۇرمىستىق جاعدايلار سەبەپ بولعان. قالعان 130 وقيعا باسقا كۇشتىك قۇرىلىمداردا تىركەلگەن. ولاردىڭ قاتارىندا قورعانىس مينيسترلىگىنەن باسقا توتەنشە جاعدايلار مينيسترلىگى، شەكارا قىزمەتى، ۇلتتىق ۇلان جانە مەملەكەتتىك كۇزەت قىزمەتى بار. سونىمەن قاتار، 86 سۋيتسيد فاكتىلەرى دە بارلىق كۇشتىك قۇرىلىمدارعا تيەسىلى. ناقتىراق ايتساق، سوڭعى ءتورت جىلدا قارۋلى كۇشتەردە 40 سۋيتسيد وقيعاسى تىركەلگەن»، - دەدى مينيستر ورىنباسارى جاۋابىندا

گەنەرال-مايوردىڭ دەرەگىنشە، اتالعان 40 سۋيتسيد وقيعاسىنىڭ بارلىعى بويىنشا قىلمىستىق ءىس قوزعالعان. 34 وقيعا بويىنشا قىلمىستىق ىستەر وندىرىسپەن اياقتالىپ، پروتسەستىك شەشىمدەر قابىلدانعان. تەرگەۋ بارىسىندا ءوزىن-ءوزى ولتىرۋگە دەيىن جەتكىزۋ بەلگىلەرى انىقتالماعان. وسىعان بايلانىستى، قىلمىستىق ىستەر قىلمىستىق قۇقىق بۇزۋشىلىق قۇرامىنىڭ بولماۋى سەبەبىنەن توقتاتىلعان.

«قابىلدانعان پروتسەستىك شەشىمدەردىڭ زاڭدىلىعى قاداعالاۋشى ورگانمەن (پروكۋراتۋرا) تەكسەرىلگەن جانە كەلىسىلگەن. سونىمەن قاتار، قازىرگى كەزدە 6 وقيعا بويىنشا سوتقا دەيىنگى تەرگەپ-تەكسەرۋلەر جالعاسۋدا. ناقتى سەبەپتەر مەن ءمان-جايلار تەرگەۋ قورىتىندىسى بويىنشا انىقتالاتىن بولادى. قىلمىستىق-پروتسەستىك زاڭناماعا سايكەس قىلمىستىق قۇقىق بۇزۋشىلىقتىڭ وسى ءتۇرى بويىنشا سوتقا دەيىنگى تەرگەپ-تەكسەرۋ قر ءىىم اسكەري-تەرگەۋ ورگاندارىمەن جۇرگىزىلەدى. تەرگەۋ بارىسى باس اسكەري پروكۋراتۋرامەن قاداعالانادى. قورعانىس مينيسترلىگىنىڭ تەرگەۋ بارىسىنا ارالاسۋعا نەمەسە ىقپال ەتۋگە وكىلەتتىگى جوق»، - دەدى باقىتبەك سىدىقوۆ.

اۆتور
مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى