قورعانىس مينيسترلىگى اسكەردە ءجۇرىپ اجال قۇشقان قوس ساربازدىڭ ولىمىنە قاتىستى تۇسىنىكتەمە بەردى
استانا. KAZINFORM - قورعانىس مينيسترلىگى مەرزىمدى قىزمەتتەگى اسكەري قىزمەتشىلەر تۋرالى جاريالانىمدارعا قاتىستى تۇسىنىكتەمە بەردى.
«قاتارداعى جاۋىنگەر ەربايان مۇحتاروۆ پەن قاتارداعى جاۋىنگەر الماس شاحيموۆتىڭ ولىمىنە قاتىستى فاكتىلەر ۇلتتىق ۇلاندا ورىن الدى جانە ونىڭ قارۋلى كۇشتەرگە قاتىسى جوق. 2024-جىلعى 13-مامىردا سارىوزەك كەنتىندەگى 29108 اسكەري ءبولىمىنىڭ مەرزىمدى قىزمەتتەگى قاتارداعى جاۋىنگەرى دوسىمجان ءسالىمجاننىڭ قايتىس بولۋىنا بايلانىستى قىلمىستىق ءىس قوزعالدى. اسكەري قىزمەتشىنىڭ اتا-اناسىنا جان-جاقتى قولداۋ كورسەتىلىپ، بارلىق ءتيىستى وتەماقىلار تولەنەتىن بولادى»، - دەلىنگەن رەسمي مالىمدەمەدە.
قورعانىس ۆەدومستۆوسى دا، اتا-انالار دا جۇرگىزىلىپ جاتقان تەرگەۋدىڭ شىنايى بولۋىنا مۇددەلى.
«اسكەري قىلمىستاردى تەرگەۋ بارىسىن ق ر باس پروكۋراتۋراسى جانە ق ر ىشكى ىستەر مينيسترلىگىنىڭ ءتيىستى بولىمشەلەرى قاداعالايدى. قارۋلى كۇشتەردىڭ باسشىلىعى مەن اسكەري بولىمدەردىڭ قولباسشىلىعى تەرگەۋ ارەكەتتەرى مەن قاجەتتى راسىمدەردى جۇرگىزۋدە اشىقتىق پەن وبەكتيۆتىلىك قاعيداتتارىن ۇستانادى» - دەپ حابارلادى قورعانىس مينيسترلىگىنىڭ باسپا ءسوز قىزمەتى.
