قورعانىس ءمينيسترى سپورتتىق جانە جاۋىنگەرلىك سامبو فەدەراتسياسىن باسقارادى
استانا. KAZINFORM - قورعانىس ءمينيسترى رۋسلان جاقسىلىقوۆ قازاقستاننىڭ سپورتتىق جانە جاۋىنگەرلىك سامبو فەدەراتسياسىن باسقارادى.
قورعانىس مينيسترلىگىنىڭ مالىمەتىنشە، سايلاۋ استاناداعى سپورتتىق جانە جاۋىنگەرلىك سامبو فەدەراتسياسىنىڭ كەزەكتەن تىس وتىرىسىندا ءوتتى. رۋسلان جاقسىلىقوۆتىڭ كانديداتۋراسىنا فەدەراتسيانىڭ بارلىق مۇشەسى ءبىراۋىزدان داۋىس بەردى. ول بۇل قىزمەتكە ايدوس اقجانوۆتىڭ ورنىنا كەلدى.
قوعامدىق بىرلەستىكتىڭ جاڭا باسشىسى رۋسلان جاقسىلىقوۆ - دزيۋدودان ك س ر و سپورت شەبەرى، بىرنەشە دۇركىن چەمپيون، سامبو مەن دزيۋدودان رەسپۋبليكالىق جانە حالىقارالىق جارىستاردىڭ جۇلدەگەرى.
- فەدەراتسيا مۇشەلەرىنە ناتيجەلى جۇمىسى مەن ماعان كورسەتكەن سەنىمى ءۇشىن العىسىمدى بىلدىرەمىن. سپورتتىق جانە جاۋىنگەرلىك سامبو اسكەري جانە قۇقىق قورعاۋ قىزمەتىندە جەكە قۇرامدى دايارلاۋ جۇيەسىندە ءساتتى قولدانىلادى. ءبىز سپورتتىڭ بۇل ءتۇرىن، ونىڭ ىشىندە اسكەري-قولدانبالى سپورت رەتىندە كەڭ كولەمدە دامىتۋعا ۇلكەن كۇش سالامىز، - دەدى گەنەرال-پولكوۆنيك رۋسلان جاقسىلىقوۆ.
فەدەراتسيانىڭ جاڭا پرەزيدەنتى الداعى جوسپارىن جاريالادى.
- 2025-جىلى سامبو ت م د- عا قاتىسۋشى مەملەكەتتەر دوستىق ارميالارىنىڭ اسكەري-سپورتتىق ويىندارىنىڭ باعدارلاماسىنا جانە قازاقستان قارۋلى كۇشتەرىنىڭ سپارتاكياداسىنا ەنگىزىلەدى. سونداي-اق جاستارعا اسكەري-پاتريوتتىق تاربيە بەرۋ ماقساتىندا كەشەندى سپورتتىق ءىس-شارالار، ونىڭ ىشىندە ق ر قورعانىس ءمينيسترىنىڭ كۋبوگىنا سامبودان اشىق رەسپۋبليكالىق تۋرنير وتكىزۋ جوسپارلانعان. باۋىرجان مومىش ۇلى اتىنداعى الماتى اسكەري-سپورت كوللەدجىندە سامبو بولىمشەسىن اشۋ جوسپاردا بار. وندا كوپ بالالى وتباسىلار، اسكەريلەر مەن اۋىل جاستارىنىڭ بالالارىنا ارتىقشىلىق بەرىلەدى. سپورتتىڭ بۇل ءتۇرىن جاپپاي دامىتۋ ماقساتىندا قارۋلى كۇشتەر قاتارىنا جاۋىنگەرلىك سامبودان مامان-نۇسقاۋشىلاردى شاقىرامىز، - دەدى فەدەراتسيا پرەزيدەنتى.
ايماقتىق فەدەراتسيالار دا داميتىن بولادى. بۇگىندە 1100 ءدىڭ ۇستىندەگى سەكسيادا قىرىق مىڭنان استام ادام سامبومەن شۇعىلدانادى.
حالىقارالىق سامبو فەدەراتسياسىنا كىرەتىن فەدەراتسيا سپورتتىق جانە جاۋىنگەرلىك سامبونى جاپپاي دامىتۋعا، سونداي-اق قازاقستاندىق سامبيستەردىڭ حالىقارالىق جارىستاردا ونەر كورسەتۋىنىڭ ناتيجەلىلىگىنە بارىنشا كۇش سالماق.
رۋسلان جاقسىلىقوۆ اسكەرگە بارعىسى كەلمەيتىن جاستارعا سىن ايتقانىن جازعان بولاتىنبىز.
