قورعانىس ءمينيسترى جوعارى لاۋازىمدى شەنەۋنىكتەردىڭ قايسىلارى بالالارىن اسكەرگە جىبەرگەنىن ايتتى
قورعانىس ءمينيسترى رۋسلان جاقسىلىقوۆ جوعارى لاۋازىمداعى شەنەۋنىكتەردىڭ بالالارىن اسكەرگە بارۋىن مىندەتتەۋ مۇمكىندىگىنە قاتىستى پىكىر ءبىلدىردى، دەپ حابارلايدى Kazinform.
«قازىر ول جوعارى وقۋ ورنىندا وقىپ جاتىر، 20 جاسقا تولدى. وقۋىن بىتىرگەننەن كەيىن، ونى مىندەتتى تۇردە اسكەر قاتارىنا جىبەرەمىن»، - دەدى ر. جاقسىلىقوۆ.
بۇگىن ءماجىلىستىڭ جالپى وتىرىسىندا پالاتا دەپۋتاتتارى مينيستردەن جوعارى لاۋازىمداعى شەنەۋنىكتەردىڭ بالالارىن اسكەردەگى قىزمەتكە شاقىرتۋدى مىندەتتەۋ مۇمكىندىگى تۋرالى زاڭناما نورماسىن ەنگىزۋ جايىندا سۇرادى.
«ۇلدارىن اسكەرگە جىبەرگەندەر بۇل جايىندا كوپشىلىككە جاريالامايدى. بۇل تۇرعىدا پاتريوتتار ءوز ارەكەتىن بارشاعا مالىمدەمەيدى. وسى تاقىرىپ بويىنشا بۇرىنعى ىشكى ىستەر ءمينيسترى قالمۇحانبەت قاسىموۆتى ۇلگى رەتىندە كەلتىرگىم كەلەدى. ول كىسى ەكى ءىنىسىن الىپ كەلىپ، اسكەر قاتارىنا قوستى. بۇرىنعى سەناتور مۇحتار قۇل-مۇحاممەدتىڭ ۇلى مەكتەپ بىتىرگەننەن كەيىن مەرزىمدى اسكەري قىزمەتتەگى بورىشىن وتەپ، قازىر ا ق ش اسكەري ۋچيليشەسىنىڭ كۋرسانتى اتاندى. مينيسترلەر مەن دەپۋتاتتاردىڭ ۇلدارىن بولەكتەيتىن مۇنداي تالاپتىڭ ماعىناسى جوق، زاڭ بارىنە بىردەي»، - دەدى ر. جاقسىلىقوۆ.
ايتا كەتەيىك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
سونىمەن قاتار مينيستر تىلشىلەر سۇراعىنا جاۋاپ بەرۋ كەزىندە ءوز ۇلىن دا اسكەرگە جىبەرەتىنىن ايتتى.
