قونايەۆتا 14 جاسار قىزدى زورلادى دەگەن كۇدىكپەن ەكى ەكس-پوليتسەي ۇستالدى
قونايەۆ قالاسىندا بۇرىنعى ەكى پوليتسيا قىزمەتكەرى كامەلەتكە تولماعان قىزدى زورلادى دەگەن كۇدىككە ءىلىندى، دەپ حابارلايدى Kazinform.
«انونيمدى دەرەككوزدىڭ مالىمەتىنشە، قونايەۆ قالاسىندا ەكى پوليتسيا قىزمەتكەرى قىزمەتتىك جاعدايىن پايدالانىپ، 14 جاسار وقۋشى قىزبەن جىنىستىق قاتىناسقا ءتۇسىپ، ونى ۆيدەوعا تۇسىرگەن (ۆيدەونى قازىر قىزمەتكەرلەردىڭ وزدەرى تاراتىپ جاتىر). بىزگە بەلگىلىسى، ونىڭ ءبىرى كامەلەتكە تولماعاندار جونىندەگى ينسپەكتور، ەكىنشىسى - عيماراتتى كۇزەتەتىن پوليتسيا قىزمەتكەرى، قازىر ەكەۋى دە قاماۋعا الىنىپ، جۇمىستان بوساتىلعان»، - دەپ جازىلعان قوردىڭ Instagram پاراقشاسىندا.
الماتى وبلىسىنىڭ پوليتسيا دەپارتامەنتى ەكى كۇدىكتىنىڭ قاماۋعا الىنعانىن حابارلادى.
«7- قاراشادا الماتى وبلىسىنىڭ 43 جاستاعى تۇرعىنى ەكى ادامنىڭ كامەلەتكە تولماعان قىزىنا قاتىستى سەكسۋالدى سيپاتتا زورلىق-زومبىلىق جاساعانىن ايتىپ، پوليتسياعا جۇگىندى. سول كۇنى ق ر ق ك 120-بابى، 3-1-بولىگى، 1-تارماعى بويىنشا ەكى قىلمىستىق ءىس تىركەلدى. جەدەل-ىزدەستىرۋ شارالارى بارىسىندا پوليتسيا قىزمەتكەرلەرى جەكە باسىن انىقتاپ، 23 جانە 22 جاستاعى ەكى كۇدىكتىنى ۇستادى. تەرگەۋ ناتيجەسى بويىنشا ولار قاماۋعا الىندى»، - دەپ حابارلادى الماتى وبلىسى پوليتسيا دەپارتامەنتىنىڭ باسپا ءسوز قىزمەتى.
سونداي-اق پوليتسيانىڭ مالىمەتىنشە، قىلمىس جاساعانعا دەيىن پوليتسەيلەر جۇمىستاعى كەمشىلىكتەرى ءۇشىن ءوز ەركىمەن جۇمىستان بوساتۋ جونىندە ءوتىنىش جازعان.
الايدا ول كەزدە جۇمىستان بوساتۋ تۋرالى بۇيرىق شىقپاعان بولاتىن. سول سەبەپتى قىلمىس جاساعان كەزدە ولار پوليتسيا قىزمەتكەرلەرى بولىپ سانالادى.
«قازىرگى ۋاقىتتا ولار جۇمىستان شىعارىلىپ، ۋاقىتشا ۇستاۋ يزولياتورىنا قاماۋعا الىندى»، - دەپ حابارلادى پوليتسيا.
جاقىن ۋاقىتتا سوتقا دەيىنگى تەرگەۋ اياقتالىپ، قىلمىستىق ءىس ماتەريالدارى سوتقا جولدانادى.
ق ر ق ى ج ك 201-بابىنىڭ تالاپتارىنا سايكەس وزگە اقپارات جاريالانبايدى.
ەسكە سالساق، بۇعان دەيىن قىز زورلادى دەگەن كۇدىكپەن تالدىقورعان قالالىق پوليتسيا باسقارماسىنىڭ باسشىسى قاماۋعا الىنعان بولاتىن.
