قوعامدىق ماراپاتتار تاپسىرۋ جاعدايلارى جيىلەپ كەتكەن - ەرلان كارين
استانا. KAZINFORM - مەملەكەتتىك كەڭەسشى ەرلان قاريننىڭ توراعالىعىمەن مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى، - دەپ حابارلايدى اقوردا.
كوميسسيا جۇمىسىنا پارلامەنت دەپۋتاتتارى، ورتالىق جانە جەرگىلىكتى اتقارۋشى ورگانداردىڭ باسشىلارى، بەلگىلى قوعام قايراتكەرلەرى جانە عالىمدار قاتىستى.
جيىندا مادەنيەت جانە اقپارات ءمينيسترى ايدا بالايەۆانىڭ مەملەكەتتىك رامىزدەردى ناسيحاتتاۋ مەن قولدانۋ باعىتىندا اتقارعان جۇمىستاردىڭ جاي-كۇيى جانە قولدانىستاعى زاڭنامالىق نورمالارعا سايكەستەندىرۋ ءۇشىن مەملەكەتتىك ورگانداردىڭ كەيبىر ۆەدومستۆولىق ناگرادالارىنا وزگەرىس ەنگىزۋ تۋرالى ۇسىنىسى تىڭدالدى.
مەملەكەتتىك كوميسسيا وتىرىسىندا مەملەكەتتىك قىزمەت ىستەرى اگەنتتىگىنىڭ، توتەنشە جاعدايلار، ونەركاسىپ جانە قۇرىلىس مينيسترلىكتەرىنىڭ، مەملەكەتتىك كۇزەت قىزمەتىنىڭ ۇسىنعان ۆەدومستۆولىق ناگرادالارى بويىنشا وڭ شەشىم قابىلداندى. سونىمەن قاتار كەيبىر مەملەكەتتىك ورگاندار ۇسىنعان ۆەدومستۆولىق ناگرادالارعا قاتىستى ەسكەرتۋلەر ايتىلدى.
ەرلان قارين ۋاكىلەتتى ورگانعا وڭىرلىك نىشانداردى ازىرلەۋ مەن بەكىتۋ جۇيەسىن رەتكە كەلتىرۋ بويىنشا ۇلگىلىك قاعيدا جانە مەملەكەتتىك رامىزدەردىڭ قولدانىلۋى مەن ناسيحاتتالۋىن ودان ءارى ارتتىرۋعا باعىتتالعان كەشەندى جوسپار ازىرلەپ، ولاردى ۇكىمەت ارقىلى بەكىتۋ قاجەت ەكەنىن اتاپ ءوتتى.
«سوڭعى ۋاقىتتا جەكەلەگەن ازاماتتار مەن قوعامدىق ۇيىمدار تاراپىنان مەملەكەتتىك ناگرادالاردىڭ اتىن، كەسكىنىن، كەيبىر ەلەمەنتتەرىن قايتالايتىن قوعامدىق ماراپاتتار تاپسىرۋ جاعدايلارىنىڭ جيىلەپ كەتكەنىنە جانە وسىنداي ارەكەتتەرگە قۇقىقتىق نەگىزدە توسقاۋىل قويۋ كەرەك» - دەدى مەملەكەتتىك كەڭەسشى.
وسىعان وراي، مادەنيەت جانە اقپارات، ادىلەت مينيسترلىكتەرىنە ءتيىستى تاپسىرمالار بەرىلدى.
سونىمەن قاتار كوميسسيا وتىرىسىنىڭ قورىتىندىسى بويىنشا ورتالىق مەملەكەتتىك ورگاندار مەن جەرگىلىكتى اكىمدىكتەرگە ءبىرقاتار حاتتامالىق تاپسىرما جۇكتەلدى.
