قوبىزشى ءلايلا تاجىبايەۆا رەسپۋبليكا كۇنى قارساڭىندا قازاقستاندىقتارعا ەرەكشە تارتۋ جاسادى
قازاقستاندىق قوبىزشى ءلايلا تاجىبايەۆا رەسپۋبليكا كۇنى قارساڭىندا قازاقستاندىقتارعا ەرەكشە تارتۋ جاسادى. ول بيىكتەن پاراشيۋتپەن سەكىرۋ بارىسىندا قوبىزبەن كۇي ورىندادى، دەپ حابارلايدى Kazinform.
قوبىزشى ءلايلا تاجىبايەۆا اۋەدە ىقىلاستىڭ «جەزكيىك» كۇيىن ورىنداپ شىقتى. ول گولليۆۋدتاعى ورىنداۋشىلىق ونەر بويىنشا دۇنيەجۇزىلىك چەمپيوناتتا بىرنەشە التىن مەدال يەگەرى اتانعان.
اتالعان جوبانى قوبىزشى ءلايلا تاجىبايەۆا مەن قازاقستان اۆياتسيالىق سپورت فەدەراتسياسىنىڭ ۆيتسە- پرەزيدەنتى تيموفەي مەركۋلوۆ بىرلەسە جۇزەگە اسىردى.
ونەر يەسى اتالعان جوبانى جۇزەگە اسىرۋعا تىڭعىلىقتى دايىندالعان. بارلىق قاۋىپسىزدىك شاراسىنا نازار اۋدارىلدى. قوبىز قۇلاپ كەتپەۋى ءۇشىن ارنايى مىقتاپ بەكىتىلدى. اسپاپ ونەر يەسىنىڭ قولىنان ءتۇسىپ كەتكەن جاعدايدىڭ وزىندە جەردە جانە اۋەدە ەشكىمگە زيانىن تيگىزبەيتىن ەدى.
پاراشيۋتپەن سەكىرۋ 3500 مەتر بيىكتىكتە ورىندالدى.
- ءبىز گيننەستىڭ رەكوردتار كىتابىنا ەنۋ ماقساتىندا پاراشيۋتپەن سەكىرۋ بارىسىندا قوبىزبەن كۇي تارتۋعا شەشىم قابىلدادىق. بۇل جاڭا تاجىريبە. مەنىڭشە، پاراشيۋتپەن سەكىرگەن ادامعا ءبارى وڭاي بولىپ كورىنەدى، - دەپ اتاپ ءوتتى قوبىزشى ءلايلا تاجىبايەۆا.
