قۇرباندار بار: تۇركيادا تاعى ءبىر كۋرورتتىق قوناق ءۇي ورتەندى
استانا. KAZINFORM - تۇركيانىڭ بۋرسا پروۆينتسياسىندا ۋلۋداگ تاۋ شاڭعىسى كۋرورتىنداعى قوناق ءۇي ورتەنىپ، بىرنەشە ادام قۇتقارىلدى. وقىس وقيعا كەزىندە وپات بولعاندار دا بار. قازىرگى ۋاقىتتا ءورت تولىقتاي سوندىرىلگەن. بۇل تۋرالى CNN Turk ارناسى حابارلادى.
ءتىلسىز جاۋ بيىلعى جىلدىڭ قاڭتارىندا تۋريستىك قىزمەتكە جارامسىز بولعاندىقتان جابىلعان قوناق ۇيدە بولعان. قوناق ءۇي سەرتيفيكاتىنىڭ مەرزىمى ءوتىپ كەتكەن، ال ونىڭ بيزنەس ليتسەنزياسىن مۋنيتسيپاليتەت ۇزارتپاعان.
بۋرسا مۋنيتسيپاليتەتىنىڭ مەرى مۇستافا بوزبەي تەلەارناعا تىكەلەي ەفيردە ءورت سوندىرۋشىلەردىڭ وقيعا ورنىنا دەرەۋ جەتكەنىن ايتتى. سۇحبات كەزىندە ول ءتورت ادامنىڭ قۇتقارىلعانىن، سونداي-اق ءبىر ءولىم تۋرالى حابارلادى.
Sabah باسىلىمى قازا تاپقاندار سانى 2 ادامعا جەتكەنىن مالىمدەدى.
- توتەنشە جاعداي سالدارىنان شاڭعىشى بەركىن ۋستا مەن ونىڭ اكەسى، تۇركيا شاڭعى جانە سنوۋبورد مۇعالىمدەرى قاۋىمداستىعىنىڭ پرەزيدەنتى بولعان ياحيا ۋستا قايتىس بولدى. بەركىن ۇستانىڭ اناسى فيكريە ۋستا ەس-ءتۇسسىز اۋرۋحاناعا جەتكىزىلدى، - دەپ حابارلادى باسىلىم.
ءورت كەزىندە عيماراتتا 12 ادام بولعان. ياحيا ۇستا مەن ونىڭ ۇلى بەركىننىڭ قايتىس بولعانىن باسقا دا ب ا ق كوزدەرى راستادى.
قازىرگى ۋاقىتتا ءورت تۋرالى حابارلاما ساعات 05:29 دا تۇسكەنى، تەز ارادا قىزىل جالىن ءسوندىرىلىپ، وقيعا ورنىندا 25 تەحنيكا مەن 60 ادام جۇمىس ىستەگەنى بەلگىلى بولدى.
ايتا كەتەيىك، قاڭتار ايىندا تۇركياداعى قوناقۇيدەن شىققان ورتتەن ءبىر وتباسىنان 14 ادام قازا تاپقان بولاتىن. ەل پرەزيدەنتى ەردوعان ولاردىڭ جاقىندارى مەن تۋىستارىنا كوڭىل ايتتى.
تۇركيانىڭ بولۋ پروۆينتسياسىنداعى كارتالكايا تاۋ شاڭعىسى كۋرورتىنداعى قوناق ۇيدەگى ورتتەن 79 ادام قازا تاپتى.
قوسا كەتەيىك، تۇركيانىڭ الانيا قالاسىندا سالىنىپ جاتقان قوناق ءۇي عيماراتىندا دا ءورت بولىپ، ەكى ساعاتتان سوڭ تولىقتاي سوندىرىلگەن ەدى.
