قۇلسارىنىڭ 250 تۇرعىنىنا زالال كەلگەن مۇلكى ءۇشىن وتەماقى بەرىلەدى
اتىراۋ. KAZINFORM - قۇلسارى قالاسىندا سۋ تاسقىنىنان زارداپ شەككەن تۇرعىنداردىڭ تۇرعىن ءۇيى مەن مۇلكىن باعالاۋ ناتيجەسىمەن تانىستىرۋ جۇمىستارى جالعاسىپ جاتىر.
موبيلدى توپتار كۇشەيتىلگەن رەجيمدە جۇمىس ىستەپ جاتىر.
«ءۇيدى ارالاۋ بارلىق باعالاۋ جۇمىستارى تولىق اياقتالعانعا دەيىن كۇن سايىن دەمالىسسىز جالعاساتىن بولادى. بۇگىنگى تاڭدا قۇلسارى قالاسى بويىنشا سۋ باسقان تۇرعىن ءۇي يەلەرىنەن تۇسكەن 250 ءوتىنىم قارالدى»، - دەلىنگەن حابارلامادا.
سونىمەن قاتار، سۋ تاسقىنى كەزىندە زارداپ شەككەن تۇرعىندارمەن اقشالاي وتەماقى تولەۋ بويىنشا كەلىسىمدەر جاساسۋ بويىنشا جۇمىستار جەرگىلىكتى مادەنيەت ۇيىندە جۇرگىزىلىپ جاتىر.
قۇلسارى قالاسىنىڭ تۇرعىنى تويعان قارابايەۆا باعالاۋ ناتيجەسىندە كورسەتىلگەن اقشالاي وتەماقى سوماسىن الۋعا كەلىسىپ وتىر. ونىڭ ءۇيى 5-ساۋىردە سۋ تاسقىنى كەزىندە قۇلاپ قالعان بولاتىن. شارۋاشىلىق عيماراتتار دا زارداپ شەكتى.
- مەن قازىر قۇلسارىداعى شاعىن اۋداندارىنىڭ بىرىندە پاتەر جالداپ ءجۇرمىن. سوندىقتان، تەزىرەك باسپانا ساتىپ الۋىم كەرەك. اقشالاي وتەماقى العاننان كەيىن جاڭادان ءۇي سالامىن نەمەسە جاڭا ءۇي ساتىپ الۋىم دا مۇمكىن. ماعان وتەماقى بەرىپ وتىرعان مەملەكەتكە العىس ايتامىن، - دەدى تويعان قارابايەۆا.
زارداپ شەككەندەردىڭ قاتارىندا قۇلسارى قالاسىنىڭ اتىراۋ شاعىن اۋدانىنىڭ تۇرعىنى لاۋرا ساندىبايەۆا دا بار. ونىڭ ءۇيى 5-ساۋىردە سۋ استىندا قالعان بولاتىن. كەيىن اۋلاسى قۇرعاتىلىپ، ءۇي مامانداردىڭ باعالاۋىنان ءوتتى.
- ماعان ەكى باعالاۋ كوميسسياسى كەلدى. قازىر مەن ولاردىڭ جۇمىسىنىڭ ناتيجەلەرىن جانە سۋ باسقان تۇرعىن ءۇيىمنىڭ زالالىن جاريالاۋدى كۇتىپ ءجۇرمىن. ەگەر ۇسىنىلعان سوما قاجەتىمدى وتەيتىن دەڭگەيدە بولسا، مەن اقشالاي وتەماقى الۋعا كەلىسىم بەرەمىن، - دەدى لاۋرا ساندىبايەۆا.
باعالاۋ ناتيجەلەرىمەن تانىسقاننان كەيىن ەكى كۇن وتكەن سوڭ، قۇلسارى تۇرعىندارى مەملەكەتتەن كومەك الۋ ءۇشىن جىلىوي اۋدانىنىڭ اكىمدىگىنە جۇگىنە الادى. كەلىسىم اياسىندا تۇرعىندار زارداپ شەككەن تۇرعىن ءۇي ءۇشىن وتەماقى وپتسيالارىن تاڭداي الادى.
اۆتور
باقىتگۇل اباي قىزى
