قۇلاعان تۋننەل استىندا 40 جۇمىسشى قالىپ قويدى
قۇتقارۋشىلار ءۇندىستاننىڭ سولتۇستىگىندە قۇرىلىس كەزىندە قۇلاعان اۆتوموبيل تۋننەلىندە ءۇيىندى استىندا قالعان 40 جۇمىسشىعا جەتە الماي جاتىر، دەپ حابارلايدى Kazinform اگەنتتىگى AP رەسۋرسىنا سىلتەمە جاساپ.
بارلىق قۇرىلىسشىلار ءتىرى، دەپ حابارلادى پوليتسيا قىزمەتكەرى پراشانت كۋمار، ولار سۋ جانە وتتەگىمەن قامتاماسىز ەتىلگەن.
ونىڭ ايتۋىنشا، قۇتقارۋشىلار كەپتەلىپ قالعان جۇمىسشىلارمەن بايلانىس ورناتقان.
وقيعا جەكسەنبى كۇنى ۋتتاراكحاند شتاتىندا بولعان. بۇل شتات تۋريستەر اراسىندا وتە تانىمال.
سوڭعى جىلدارى ۋتتاراكحاندتا عيماراتتار مەن جولداردىڭ اۋقىمدى قۇرىلىسى جۇرگىزىلىپ جاتىر.
وقيعا فەدەرالدى ۇكىمەتتىڭ ءتۇرلى زيارات ورىندارىن بايلانىستىرۋعا ارنالعان فلاگماندىق جوباسى - چاردحەم تاسجولىندا بولعان.
تۋننەل قۇرىلىسىن قاداعالايتىن Navyug قۇرىلىس كومپانياسىنىڭ جوبا مەنەدجەرى رادجەش پاۆار دۇيسەنبى كۇنى قۇرساۋدا قالعان جۇمىسشىلاردىڭ ناقتى سانىن راستادى.
قۇتقارۋ جۇمىستارى جەكسەنبى كۇنى باستالدى. قۇتقارۋشىلار تۋننەلدىڭ قۇلاعان بولىگىنە قۇبىر ارقىلى وتتەگى ايدادى.
قۇتقارۋ توبى 15 مەتر ىلگەرى ءوتتى، ءۇيىندى استىندا قالعاندارعا جەتۋ ءۇشىن ءالى 35 مەتر بار.
وقيعا ورنىندا ءتۇنى بويى 150 دەن استام قۇتقارۋشى جۇمىس ىستەگەن.
بۇرعىلاۋ تەحنيكاسى مەن ەكسكاۆاتورلار دا جۇمىلدىرىلدى.
