قۇجاتىن، بەت-بەينەسىن وزگەرتكەن: اقمولا وبلىسىندا 26 جىل ىزدەۋدە بولعان قىلمىسكەر ۇستالدى
كوكشەتاۋ. KAZINFORM - اقمولا وبلىسى اۋماعىندا 90 -جىلدارى اۋىر قىلمىستاردى جاساپ، 26 جىل بويى ىزدەۋدە جۇرگەن قىلمىستىق توپتىڭ سوڭعى مۇشەسى قولعا ءتۇستى.
وبلىستىق پ د باسپا ءسوز قىزمەتىنىڭ مالىمەتىنشە، 6 ادامنان تۇراتىن قىلمىستىق توپ مۇشەلەرى 4 ادامدى ءولتىرۋ، جۇرگىزۋشىلەردى توناۋ، ەكونوميكالىق كونتراباندا جانە بيلىك وكىلىنىڭ نەمەسە لاۋازىمدى تۇلعانىڭ اتاعىن ءوز بەتىنشە تاعايىنداۋ ءتارىزدى قىلمىس جاساعان.
قىلمىسكەرلەرگە 26 جىل بۇرىن ىزدەۋ جاريالاندى. 1998 -جىلدارى ميليتسيا قىزمەتكەرلەرىنىڭ قىزمەتتىك كيىمىن كيگەن جانە اۆتوماتتى اتىس قارۋىمەن قارۋلانعان قىلمىسكەرلەر قالا سىرتىنداعى اۆتوجولداردا جەزلدىڭ (ارنايى تاياق) كومەگىمەن اۆتوكولىكتەردى توقتاتىپ، جۇرگىزۋشىلەرى مەن جولاۋشىلارىن اتىپ، ورمان القاپتارىنا دەنەلەرىن كومىپ تاستاپ وتىرعان. ال، اۆتوكولىكتەرىن زاڭسىز ساتقان.
«1999 -جىلى باندانىڭ 4 مۇشەسىن پوليتسيا قىزمەتكەرلەرى ۇستادى، بىرەۋى كوز جۇمدى. كەيىننەن سوت ۇكىمىمەن ۇستالعان تورتەۋدىڭ ەكەۋى ءولىم جازاسىنا، ەكەۋى ۇزاق ۋاقىتقا باس بوستاندىعىنان ايىرۋ جازاسىنا كەسىلدى. ال 26 جىل بويى پوليتسيادان بوي تاسالاپ جۇرگەن قىلمىستىق توپتىڭ سوڭعى مۇشەسى 27-قاڭتاردا كوكشەتاۋدا قولعا ءتۇستى. ول ءوزىنىڭ تەگىن، اتىن، اكەسىنىڭ اتىن جانە تۋعان جىلىن زاڭسىز وزگەرتىپ العان. ءتىپتى، بەت-بەينەسىن دە وزگەرتكەن. قازىرگى ۋاقىتتا قاجەتتى تەرگەۋ راسىمدەرى جۇرگىزىلىپ جاتىر»، - دەدى ۆەدومستۆودان.
