قازىر ۇكىمەتتىڭ وتستاۆكاسى ماسەلەسىن كوتەرۋگە نەگىز جوق - سەنات ءتوراعاسى
استانا. KAZINFORM - سەنات ءتوراعاسى ماۋلەن اشىمبايەۆ ەل ۇكىمەتىنىڭ جۇمىسىنا قاتىستى پىكىر ايتتى.
بۇگىن سەناتتىڭ جالپى وتىرىسىنان كەيىن تىلشىلەر «قاي جاعدايدا ەلىمىزدىڭ پارلامەنتى ۇكىمەتتىڭ وتستاۆكاسىن سۇراۋى مۇمكىن» دەگەن سۇراق قويدى.
ءوز كەزەگىندە م. اشىمبايەۆ بۇل ماسەلەلەردىڭ بارلىعى زاڭدا رەتتەلگەنىن ەسكە سالدى.
- قازىر ەلىمىزدە وسىنداي ماسەلەلەردى (ۇكىمەتتىڭ وتستاۆكاسىن) كوتەرۋگە نەگىز جوق دەپ سانايمىن. ۇكىمەتتەگى ارىپتەستەرىمىز بۇگىن سەناتتاعى تالقىلاۋ كەزىندە ينۆەستيتسيانى تارتۋعا قاتىستى ءبىراز جۇمىس اتقارىلىپ جاتقانىن حابارلادى. سونىمەن قاتار، ينفلياتسيانى تەجەۋ بويىنشا ءتيىستى قادامداردى جاساپ وتىر. سوندىقتان الداعى ۋاقىتتا ءبىز ۇكىمەتپەن بىرلەسىپ جۇمىس ىستەيمىز، ياعني پارلامەنتتىڭ دە جاۋاپكەرشىلىگى بار، - دەدى سەنات ءتوراعاسى.
بۇل تۇرعىدا ول ەلىمىزدەگى ينفلياتسيانى تەجەۋ نەگىزگى ماقساتتاردىڭ ءبىرى ەكەنىن اتاپ ءوتتى.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «2024-2026-جىلدارعا ارنالعان رەسپۋبليكالىق بيۋجەت تۋرالى» زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.
