قازيپا قالي قىزى: ناۋرىزناما باستالعالى بەرى ۇلتتىق كيىمدەرگە سۇرانىس ارتتى

ناۋرىزناماعا سايكەس بۇگىن، 18-ناۋرىز - ۇلتتىق كيىم كۇنى. وسى ورايدا turkystan.kz سايتىنىڭ ءتىلشىسى ۇلتتىق كيىمدەردى دارىپتەپ، ناسيحاتتاپ جۇرگەن ديزاينەر قازيپا قالي قىزىنا حابارلاسىپ، پىكىرلەسكەن بولاتىن.
«قازاقي كيىم تىگۋدى 1994 -جىلى قىتايدا جۇرگەن كەزىمدە باستاعانمىن. سول جاقتا شەبەرحانام، جالعا كيىم بەرەتىن دۇكەنىم بولدى. 1997 -جىلى قازاقستانعا قونىس اۋدارىپ، ءبىر جىلدان كەيىن «ءاز-ءسان» دەپ اتالاتىن اتەلەمدى اشتىم. سودان بەرى 27 جىل ۋاقىت ءوتتى. ۇزبەي كيىم تىگىپ كەلەمىن. ترەندتەگى ۇلتتىق ناقىشتاعى پلاش، جيلەت، شاپاندار، ابايكالار تىگەمىز. قازىر كاسىبىم ورگە دومالادى. جيىرماعا جۋىق تىگىنشىمىز بەن جەكە دۇكەنىمىز بار. سول دۇكەنىمىز ارقىلى كيىمدەردى Kaspi مەن Instagram ارقىلى ساتامىز»، - دەيدى ىسمەر.

ديزاينەردىڭ ايتۋىنشا ناۋرىزناما باستالعالى بەرى ساۋدا كوركى قىزا تۇسكەن. سەبەبى ۇلتتىق كيىمگە دەگەن حالىقتىڭ قىزىعۋشىلىعى قايتا ويانا باستادى.

«بىلتىر ناۋرىزناما باستالعاننان بەرى ۇلتتىق كيىمدەرگە سۇرانىس ارتتى. جۇرت ول ەرەكشە كيىمدەردى ناۋرىزدا عانا ەمەس، كۇندەلىكتى كيىپ جۇرەتىن بولدى. جىل ون ەكى اي توي-تومالاققا، قوناققا دەپ ساتىپ الادى. بىلتىر «AMANAT» پارتياسىنىڭ ورتالىق اپپاراتىندا وتكەن ون كۇندىك كورمەدە كيىمدەرىمىز قويىلدى، ساتىلدى. ءىس-شارالاردى ۇلتتىق ناقىشپەن بەزەندىرەمىز. ۇلتتىق كيىم كيگەنگە دە ىڭعايلى ءارى كورىك بەرىپ تۇرادى. كۇندەلىكتى تۇرمىستا، كابينەتتە، سىرتتا كيىپ جۇرە بەرۋگە بولادى. سول سەبەپتى سۇرانىس كوپ. ەرلەردىڭ تاراپىنان دا، قىز-كەلىنشەكتەردىڭ تاراپىنان دا قىزىعۋشىلىق زور. شەتەلگە دە تۇراقتى جىبەرىپ وتىرامىز. وسى ۋاقىتقا دەيىن ا ق ش، گەرمانيا، تۇركيا، يسپانيا سەكىلدى الەمنىڭ 30 ەلىنە جونەلتتىك»، - دەيدى قازيپا قالي قىزى.

سونداي-اق ول پارلامەنت ءۇيىن، «جىبەك جولى»، «حابار» تەلەارناسى جانە Qazaqstan ۇلتتىق ارناسىنىڭ «كوركەم ءومىر»، «تاڭ شولپان» باعدارلاماسىن بەزەندىرگەن. سونىمەن قاتار بۇل تىزىمدىكتە «استانا» مەن «بالاپان» تەلەارناسىنىڭ مەرەكەلىك ستۋديالارى دا بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى