قازىپ الىناتىن التىن قورى 522 تونناعا ارتتى - گەولوگيا كوميتەتى
استانا. KAZINFORM - قازاقستاندا پايدالى قازبالاردىڭ رەسۋرستارى مەن قورلارى بويىنشا ءوسىم تىركەلدى. بۇل تۋرالى گەولوگيا كوميتەتىنىڭ ءتوراعاسى ەرلان اكباروۆ ايتتى.
- قازاقستاننىڭ مينەرالدىق-شيكىزات بازاسىنا قاتتى جانە كەڭ تارالعان پايدالى قازبالار، كومىرسۋتەكتەر جانە جەراستى سۋلارى كەن ورىندارى كىرەدى. بارلىعى 987 دەن استام قاتتى پايدالى قازبالار كەن ورنى مەملەكەتتىك تەڭگەرىمگە ەسەپكە الىنعان. ودان بولەك، 355 كومىرسۋتەك، 3666 كەڭ تارالعان پايدالى قازبالار جانە 4540 جەراستى سۋلارى كەن ورىندارى بار، - دەدى ول و ك ق الاڭىندا.
سونداي-اق، كوميتەت باسشىسى قازبالاردىڭ رەسۋرستارى مەن قورلارى بويىنشا ءوسىم بارىن اتاپ ءوتتى.
- التىن 522 توننا، كۇمىس 281 مىڭ توننا، حروم كەندەرى 2383,1 مىڭ توننا، ۋران 44 مىڭ توننا، مىس 12893,6 مىڭ توننا، فوسفوريت كەندەرى 82 ميلليون توننا، مۇناي 277 ميلليون توننا، گاز 113 ميلليارد م3، كوندەنسات 1,9 ميلليون توننا، جەراستى سۋلارى تاۋلىگىنە 155,8 مىڭ م3 ءوسىم كورسەتتى، - دەيدى ەرلان اكباروۆ.
ودان بولەك، سپيكەر گەولوگيالىق بارلاۋ ناتيجەلەرى بويىنشا 2023-2024-جىلدارى 60 كەن ورنى ەسەپكە الىنعانىن ايتتى.
- 27 قاتتى پايدالى قازبالار، 10 كومىرسۋتەكتەر، 23 جەراستى سۋلارى كەن ورىندارى العاش رەت مەملەكەتتىك ەسەپكە الىندى، - دەپ ءتۇيدى ءسوزىن كوميتەت ءتوراعاسى.
بۇعان دەيىن ەلىمىزدە گەولوگتەر قانشا جالاقى الاتىنىن جازدىق.
سونداي-اق، «جاس گەولوگ» وليمپياداسىنىڭ جەڭىمپازدارى ەلىمىزدىڭ جەتەكشى 3 جوعارى وقۋ ورنىندا تەگىن ءبىلىم الۋعا مۇمكىندىگى بارىن حابارلادىق.
