پرەزيدەنت ۇكىمەتكە QazVac-تى ەكسپورتتاۋ ماسەلەسىن پىسىقتاۋدى تاپسىردى

مەملەكەت باسشىسى قاسىم-جومارت توقايەۆ ەلدەگى سانيتارلىق-ەپيدەميولوگيالىق احۋال جونىندەگى جۇمىس كەڭەسىندە وسىنداي تاپسىرما بەردى، دەپ حابارلايدى قازاقپارات ءتىلشىسى اقوردانىڭ Twitter- دەگى پاراقشاسىنا سىلتەمە جاساپ.

«تاعى ءبىر ماسەلە وسى سالاداعى جەتەكشى وندىرۋشىلەردىڭ ۆاكسينالار جەلىسىن كەڭەيتۋ قاجەتتىلىگىمەن بايلانىستى. وتاندىق فارماتسيەۆتيكالىق الاڭداردا رەسەيلىك جاڭا «سپۋتنيك لايت» ۆاكسيناسىن جەتكىزۋ جانە شىعارۋ ماسەلەسىن پىسىقتاۋ قاجەت»، - دەدى قاسىم-جومارت توقايەۆ.

پرەزيدەنت، سونداي-اق، قىركۇيەكتە وتاندىق QazVac ۆاكسيناسىن ونەركاسىپتىك كولەمدە شىعارۋ جوسپارلانعانىن ەسكە سالىپ، ونى دۇنيەجۇزىلىك دەنساۋلىق ساقتاۋ ۇيىمىندا تىركەۋدى جەدەلدەتۋ قاجەتتىگىن ايتى.

بۇل مىندەت دەنساۋلىق ساقتاۋ مينيسترلىگى مەن سىرتقى ىستەر مينيسترلىگىنە جۇكتەلىپ وتىر.

«ەكى جاقتى ۋاعدالاستىقتار شەڭبەرىندە QazVac-تى ءۇشىنشى ەلدەر نارىعىنا ىلگەرىلەتۋ جونىندەگى جۇمىستى ۇيىمداستىرۋدىڭ ماڭىزى زور. ۇكىمەتتەن وسى ماسەلەنى ەرەكشە باقىلاۋعا الىپ، ناتيجەلەرى تۋرالى ءبىر اي مەرزىمدە بايانداۋدى سۇرايمىن»، - دەگەن پرەزيدەنت ۆاكسيناتسيا ماسەلەسىندە وتاندىق بيزنەستىڭ قولداۋى وتە ماڭىزدى ەكەنىن اتادى.

«ويتكەنى، ۇجىمدىق يممۋنيتەتكە قول جەتكىزبەسەك، بيزنەس ءۇشىن ماڭىزدى سانيتارلىق شەكتەۋلەردى تولىعىمەن الىپ تاستاۋ مۇمكىن ەمەس»، - دەدى مەملەكەت باسشىسى.

ەسكە سالساق، پرەزيدەنت قاسىم-جومارت توقايەۆ ەلىمىزدەگى سانيتارلىق-ەپيدەميولوگيالىق احۋال جونىندە جۇمىس كەڭەسىن وتكىزىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى