رۋمىنيا باسىلىمى QazVac ۆاكسيناسى تۋرالى ماقالا جاريالادى
دۇنيەجۇزىلىك دەنساۋلىق ساقتاۋ ۇيىمى 2020 -جىلدىڭ 15-مامىرىندا بۇل ەكپەنى كانديدات ۆاكسينا رەتىندە تىركەلدى، دەپ حابارلايدى قازاقپارات.
بىلتىرعى جىلدىڭ قىركۇيەك ايىندا وتكىزىلگەن 1- فازانىڭ كلينيكالىق سىناعىنا 44 ەرىكتى قاتىستى، ال 17-قازاندا 200 ەرىكتىنىڭ قاتىسۋىمەن 2-فازانىڭ سىناعى باستالعان. قازاقستاندا كوروناۆيرۋسقا شالدىعۋدىڭ ءبىرىنشى وقيعاسى 2020 -جىلدىڭ ناۋرىزىندا راستالدى. 23-ناۋرىزدا ينفەكسيا جۇقتىرعان پاتسيەنتتەردەن ۇلگىلەر الىنىپ، ولاردىڭ بيولوگيالىق قاسيەتتەرى زەرتتەلىپ، COVID-19 رەتىندە انىقتالعان ۆيرۋس ءبولىندى، دەلىنگەن قازاقستان رەسپۋبليكاسى دەنساۋلىق ساقتاۋ مينيسترلىگىنىڭ مالىمدەمەسىندە.
قازاقستاننىڭ بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنىڭ ماماندارى QazVac نەمەسە QazCovid-In ۆاكسيناسىن تانىمال تەحنولوگيالىق پلاتفورما دەپ سيپاتتادى. «بۇل - يناكتيۆتەلگەن، ياعني حيميالىق ادىستەردىڭ كومەگىمەن ولتىرىلگەن، ودان كەيىن حروموتوگرافيالىق ادىستەر ارقىلى كۇردەلى باعالاۋعا ۇشىراعان كوروناۆيرۋس ينفەكسياسى قوزدىرۋشىسىنىڭ بيولوگيالىق ماسساسىن شىعاراتىن كلاسسيكالىق تەحنولوگيالىق پروتسەدۋرا».
الماتى جانە تاراز قالالارىندا ەرىك بىلدىرگەن 3000 ادامعا QazVac ۆاكسيناسى ەگىلدى. QazVac ۆاكسيناسىن ءوندىرۋ جۇمىستارىنا قاتىسقان مامانداردىڭ ءبىرى لەسپەك قۇتىمبەتوۆتىڭ اتۋىنشا، ۆاكسينانى تسەلسيي بويىنشا 2-8 گرادۋس تەمپەراتۋرادا كادىمگى ۇيدە تۇرعان توڭازىتقىشتا ساقتاۋعا بولادى.
«بۇل ۆاكسينانى ءبىزدىڭ ينستيتۋت شىعارعان. قوراپتا 10 دوزانى قۇرايتىن 10 قۇتى بار. ياعني ءار قۇتىدا ءبىر دوزادان. قۇتىعا جارتى ميلليليتر نەمەسە 10 تامشى ۆاكسينا قۇيىلعان. قولدانۋ الدىندا قۇتىنى جاقسىلاپ شايقاۋ كەرەك. بۇل قۇتى 21 كۇننەن كەيىن ەكىنشى كومپونەنتتى سالۋ ءۇشىن قولدانىلادى. ۆاكسينا 2-8 گرادۋس ارالىعىنداعى تەمپەراتۋرادا، كادىمگى ۇيدەگى توڭازىتقىشتا ساقتالادى. ونى مۇزداتۋ قاجەت ەمەس، ءبىر جىل ساقتاۋعا بولادى»، - دەدى قۇتىمبەتوۆ.
19-جەلتوقساندا قازاقستاننىڭ دەنساۋلىق ساقتاۋ مينيسترلىگى كلينيكالىق سىناقتاردىڭ 3- فازاسىن وتكىزۋگە رۇقساتىن بەردى. الماتى جانە تاراز قالالارىندا ەرىك بىلدىرگەن 3000 ادامعا QazCovid-in ۆاكسيناسى ەگىلدى. ەكپەنىڭ قانداي دا ءبىر جاناما اسەرى نەمەسە وعان شاعىم تىركەلگەن جوق. قازاقستاندا شىعارىلعان QazVac ۆاكسيناسى - ەكىدوزالىق ۆاكسينا، ونىڭ ءبىر قۇتىسى ءبىر ادامعا ەسەپتەلگەن. بۇدان باسقا، وتاندىق ۆاكسينا مۇزداتۋدى قاجەت ەتپەيدى، ول پليۋس 2-8 گرادۋس ارالىعىنداعى تەمپەراتۋرادا ساقتالا بەرەدى، دەپ اتاپ ءوتتى باسىلىم. QazCovid-In ۆاكسيناسىن كلينيكالىق سىناۋدىڭ ءۇشىنشى فازاسى 9-شىلدەگە قاراي اياقتالادى. قازاقستاندىق ساراپشىلاردىڭ ايتۋىنشا، بۇل زەرتتەۋگە 3000 ادامنان كەم بولماعان ەرىكتىلەر قاتىسىپ وتىر.
«كلينيكالىق سىناۋدىڭ ءۇشىنشى فازاسىنىڭ ناقتى اياقتالاتىن كۇنى - 2021 -جىلدىڭ 9-شىلدەسى. بۇدان كەيىن 3000 ەرىكتىنىڭ مالىمەتتەرىن وڭدەۋ بويىنشا ۇلكەن جۇمىس جۇرگىزىلەدى، وعان شامامەن 20 كۇنتىزبەلىك كۇن كەتەدى. بۇدان كەيىن ءبىزدىڭ ەسەبىمىز دەنساۋلىق ساقتاۋ مينيسترلىگىنە ۇسىنىلادى» ، - دەدى ع ز ي باسشىسى كۇنسۇلۋ زاكاريا.
قازاقستان ۆاكسينا ءوندىرىسىن ىسكە قوسقان الەم ەلدەرىنىڭ «وندىعىنا» جانە ۆاكسينا ءوندىرىسىنىڭ تولىق سيكلىن وزدىگىنەن يگەرىپ العان ەلدەردىڭ «بەستىگىنە» كىرىپ وتىر.
ەسكە سالساق، QazVac ۆاكسيناسىن كلينيكالىق زەرتتەۋدىڭ I- II فازاسىنىڭ ناتيجەلەرى بويىنشا ەسەپتەر جانە III فازاسىنىڭ ارالىق ەسەبى ونىڭ قاۋىپسىزدىگىن راستادى. 2021 -جىلى 22 ءساۋىر كۇنى COVID-19-عا قارسى قازاقستاندىق QazVac ۆاكسيناسىنىڭ العاشقى پارتياسى جونەلتىلدى. 26-ساۋىردە دەنساۋلىق ساقتاۋ ءمينيسترى الەكسەي سوي العاشقىلاردىڭ ءبىرى بولىپ ك ۆ ي- گە وتاندىق QazVac ۆاكسيناسىمەن ەكپە الدى.
اۆتور: زارينا تۋعانبايەۆا
