قازاقى ءيت تۇقىمدارىن ساقتاۋدا قانداي جۇمىس اتقارىلىپ جاتىر
ق ر پرەزيدەنتىنىڭ ءىس باسقارۋشىسى ايبەك دادەبايەۆ ۇلتتىق ءيت تۇقىمدارىن ساقتاۋدا قانداي جۇمىس اتقارىلىپ جاتقانىن ايتتى، دەپ حابارلادى Kazinform.
«ەگەمەن ەل رەتىندە ۇلتتىق قۇندىلىقتارىمىزدى ساقتاۋ جانە حالىقارالىق دەڭگەيدە ناسيحاتتاۋ قاشاندا ماڭىزدى. مەملەكەت باسشىسى تازى مەن توبەتتى قورعاۋ ماسەلەسىنە نازار اۋدارىپ، ونى قولعا الۋدى بىلتىر پرەزيدەنت ءىس باسقارماسىنا تاپسىرعان بولاتىن. سودان بەرى ءبىرتالاي شارۋا اتقارىلدى. وسى تاقىرىپقا قاتىستى مەملەكەتتىك ورگاندار وكىلدەرىمەن كەزەكتى كەزدەسۋىمىزدى وتكىزدىك. باسقوسۋدا قازاقستان كينولوگتارى وداعىنىڭ باسشىسى FCI- مەن بايلانىستى نىعايتۋ بارىسى تۋرالى باياندادى»، - دەدى ايبەك دادەبايەۆ.
ول 2024 -جىلعى مامىر ايىندا ەلوردادا حالىقارالىق يتتەر كورمەسىن، سونىڭ اياسىندا تازىلاردىڭ جەكە كورمەسىن وتكىزۋ جوسپارلانىپ وتىرعانىن جەتكىزدى. وعان FCI باسشىلىعى كەلىپ، ەلىمىزدىڭ كينولوگيا سالاسىنداعى، ونىڭ ىشىندە قازاقى ءيت تۇقىمدارىن ساقتاۋعا باعىتتالعان جۇمىسپەن تانىسپاق.
تازى مەن توبەتتىڭ ستاندارتىن جاساۋ دا وزەكتى. بۇل تازا قاندى قازاقى ءيت تۇقىمدارىن انىقتاۋعا، ولاردىڭ ستاتيستيكاسىن جۇرگىزۋگە نەگىز بولادى. تازىعا قاتىستى كينولوگتار مەن يتبەگىلەر، عالىمدار ورتاق شەشىمگە كەلدى، ال توبەتتىڭ ستاندارتىنا قاتىستى تالقىلاۋلار جالعاسىپ جاتىر.
«بيىل گەنەتيكا جانە فيزيولوگيا ينستيتۋتى تازىنىڭ گەنوفوندىن انىقتاۋعا ارنالعان زەرتتەۋدى اياقتادى. توبەتكە قاتىستى وسىنداي جۇمىس كەلەسى جىلى باستالادى. بايقاپ وتىرعاندارىڭىزداي، كەشەندى جۇمىسقا ءبىرقاتار مەملەكەتتىك ورگان مەن قوعامدىق ۇيىمدار اتسالىسىپ جاتىر. جالپى، حالقىمىزدىڭ تۇرمىس- تىرشىلىگىندە قۇماي تازى مەن تارلان توبەت ەرەكشە ورىن العانى بارشاعا بەلگىلى. سول ءۇشىن دە بابالارىمىز ونى جەتى قازىنانىڭ بىرىنە بالاعان. ۇلتتىق ءيت تۇقىمدارىن ساقتاۋ مەن قورعاۋ باعىتىنداعى جۇمىس الداعى ۋاقىتتا دا جۇيەلى تۇردە جالعاسادى»، - دەدى ق ر پرەزيدەنتىنىڭ ءىس باسقارۋشىسى ايبەك دادەبايەۆ.
ايتا كەتەيىك، جاقىندا قاسىم-جومارت توقايەۆ ءانشى ديماش قۇدايبەرگەنگە تازى كۇشىگىن سىيلاعان بولاتىن.
«دوستار، تانىسىپ قويىڭىزدار، بۇل -مەنىڭ جاڭا دوسىم. تابيعاتتىڭ بۇل عاجابىن، ياعني تازى كۇشىگىن ماعان قاسىم- جومارت كەمەل ۇلى سىيلادى. تازى - ءبىزدىڭ ۇلتىمىز ءۇشىن قۇندىلىق، بابادان قالعان جەتى قازىنانىڭ ءبىرى. قازىرگى كۇنى قازاقستاندا تازىنى ساقتاپ قالۋعا جانە حالىقارالىق دارەجەدە مويىنداۋعا باسا كوڭىل ءبولىنىپ جاتقانى قۋانتادى»، - دەپ جازدى ءانشى الەۋمەتتىك جەلىدەگى پاراقشاسىندا.
2024 -جىلى استانادا حالىقارالىق تازىلار كورمەسى وتەتىنى بەلگىلى بولدى.
اۆتور
ەلميرا ورالبايەۆا
