قازاقتىڭ قىز جىبەگى
استانا. KAZINFORM – «قىز جىبەك» ءرولىن سومداعان اكتريسا، «قۇرمەت» وردەنىنىڭ يەگەرى، قازاقستاننىڭ ەڭبەك سىڭىرگەن ءارتىسى مەرۋەرت وتەكەشوۆانىڭ تۋعان كۇنى 25-اقپان. بۇگىن تالانتتى ونەر ادامى تۋرالى اقپاراتتاردى ۇسىنامىز.
مەرۋەرت قاراتاي قىزى وتەكەشوۆا 1951 -جىلى 25-اقپاندا ورال قالاسىندا دۇنيەگە كەلگەن.
ول - اكتەر قۇمان تاستانبەكوۆتىڭ جارى، 3 پەرزەنتتىڭ اناسى.
1969-1973 -جىلدارى قازاق مەملەكەتتىك قۇرمانعازى اتىنداعى ونەر ينستيتۋتىنىڭ تەاتر فاكۋلتەتىن، ك س ر و حالىق ءارتىسى حاديشا بوكەيەۆانىڭ كلاسى بويىنشا ءبىتىردى.
بۇدان كەيىن مۇحتار اۋەزوۆ تەاترىنىڭ اكتەرلىك قۇرامىندا ەڭبەك ەتتى. تەاترداعى العاشقى ءرولى شىڭعىس ايتماتوۆتىڭ «قۇس جولى» پوۆەسى بويىنشا ساحنالانعان «انا- جەر- انا» سپەكتاكلىندەگى ءاليمان ءرولى بولدى.
ول 1968 -جىلى الماتى قالاسىنداعى №66-مەكتەپتى ءتامامداعانىندا «قىز جىبەك» كينوسىنىڭ باس كەيىپكەرىنىڭ ءرولىن سومداۋعا شاقىرتۋ الادى. 19-مامىر كۇنى «قىز جىبەك» فيلمىندەگى باس كەيىپكەر جىبەكتىڭ رولىنە 17 جاستاعى مەرۋەرت وتەكەشوۆا بىرنەشە ءجۇز قىزدىڭ ىشىنەن ىرىكتەلگەن. مەرۋەرت وتەكەشوۆا ءوزىنىڭ سومداعان ءرولىنىڭ ماڭىزى جوعالمايتىنىن ايتادى.
«قىز جىبەك» تەك قازاقستانعا تانىمال بولعان جوق. فيلمدى شەتەلدەر دە ساتىپ الىپ جاتتى. وسى ارقىلى الەم ەلدەرى قازاقتىڭ مادەنيەتىمەن، سالت-داستۇرىمەن تانىستى. ءوزىم دە «قىز جىبەكتى» قايتالاپ ءجۇز رەت كوردىم. فيلم جايلى ءالى دە ۇزاق ايتۋعا بولادى. كينو تانۋشىلار دا «قىز جىبەكتى» ەلۋ جىل وتسە دە، نەگە حالىق جالىقپاي كورەدى؟» - دەپ ايتىپ ءجۇر.
زەرتتەپ جاتقاندار دا بارشىلىق. مەنىڭ ويىمشا، ونىڭ ءبىر عانا سىرى - كينونىڭ تاربيەلىك ءمانىنىڭ جوعارىلىعىندا»، - دەيدى ول.
«قىز جىبەك» فيلمىندە قازاقتىڭ ءبىرتۋار دارىن يەلەرى كەنەنباي قوجابەكوۆ، ءسابيرا مايقانوۆا، كاۋكەن كەنجەتايەۆ، اسانالى ءاشىموۆ، ءانۋار مولدابەكوۆ، فاريدا ءشارىپوۆا، ىدىرىس نوعايبايەۆ، قۇمان تاستانبەكوۆ بوي كورسەتكەن. فيلم مەرۋەرت وتەكەشوۆانىڭ دا جۇلدىزىن جاعىپ، «قازاقتىڭ قىز جىبەگى» اتاندىردى.
