100 كەلى زىلتەمىردى ەڭسەردى: ەلوردالىق مۇعالىم 54 جاسىندا الەم چەمپيونى بولدى
استانا. KAZINFORM - استانا قالاسىنىڭ رايىمبەك باتىر اتىنداعى №50 مەكتەپ-ليتسەيىنىڭ باستاۋىش سىنىپ مۇعالىمى ايگۇل ەرجانوۆا مىسىردا پاۋەرليفتينگ سپورتىنان وتكەن اشىق الەم چەمپيوناتىندا ەكى التىن مەدال يەلەندى.
مىسىر استاناسىندا وتكەن اشىق بىرىنشىلىكتە ەلوردالىق ۇستاز زىلتەمىردى جەردەن ءىلىپ تىك كوتەرۋ سايىسىندا 100 كەلىنى وڭاي باعىندىرىپ، رەكورد تىركەدى. اتالعان جارىسقا 23 مەملەكەتتەن 2000 عا جۋىق سپورتشى قاتىستى.
ايگۇل ەرجانوۆا سپورتتىڭ بۇل تۇرىمەن 52 جاسىندا كاسىبي تۇرعىدا اينالىسا باستاعان. ال وعان دەيىن قولكۇرەسپەن، جەڭىل اتلەتيكامەن اينالىسقان.
- قازاقستان بۇل جارىسقا ءبىرىنشى رەت قاتىسىپ وتىرعان سوڭ مەنى ۇيىمداستىرۋشىلار باسىندا قىتايلىق دەپ ويلاپتى. كەيىن رەكورد ورناتقانىمدا قازاقستاننان كەلگەنىمدى ءبىلىپ، قۇرمەت كورسەتتى، - دەيدى چەمپيون.
ايتا كەتەيىك، استانالىق ءمۇعالىم بىلتىر «قازاقستاننىڭ ەڭبەك سىڭىرگەن ۇستازى» اتاعىن العان.
باپكەرى ءوزىنىڭ ءىنىسى - ايبار ەرجانوۆ. ول اۋىر اتلەتيكادان الەم چەمپيوناتى، ازيا، ەۋروپا بىرىنشىلىكتەرىندە جەڭىسكە جەتكەن.
