قازاقتىڭ 1500 مۋزىكالىق تۋىندىسى الەمدىك پلاتفورمالارعا جۇكتەلدى
مەملەكەتتىك كەڭەسشى ەرلان قاريننىڭ قاتىسۋىمەن استانادا قازاق حالقىنىڭ ءان-كۇيى مەن فولكلورلىق مۇراسى توپتاستىرىلعان «اسىل مۇرا» اۋديوجيناعىنىڭ تۇساۋكەسەرى ءوتتى.
«قازاقستان» رەسپۋبليكالىق تەلەراديوكورپوراتسياسى جارىققا شىعارعان «اسىل مۇرا» - وتاندىق مۋزىكا ونەرى تاريحىندا حالىقارالىق ستريمينگتەردە كەڭىنەن تارالعان ەڭ ءىرى جيناق. جوبا «Ozen» مۋزىكالىق لەيبلىمەن بىرگە جۇزەگە اسىرىلدى.
جيناققا «التىن قوردا» ساقتالعان 400 كۇي، 300 جىر- تەرمە، 400 حالىق ءانى مەن حالىق كومپوزيتورلارىنىڭ اندەرى، 100 ەرتەگى، 50 بەسىك جىرى، 250 رەترو حيت ءان ەنگىزىلدى.
اۋديوجيناقتىڭ ەرەكشەلىگى — مۇنداعى شىعارمانىڭ كوبى اۋتەنتيكالىق فورمادا، ياعني، العاشقى ورىنداۋشىلارى جەتكىزگەن ءتۇپنۇسقا كۇيىندە بەرىلگەن.
جوباعا ەنگەن تاڭدامالى 1500 اۋديوجازبا Apple Music, Spotify, Yandex Music, YouTube Music سياقتى الەمگە تانىمال 100 دەن استام مۋزىكالىق پلاتفورماعا جۇكتەلدى. سونداي- اق تۋىندىلار «قازاقستان» تەلەراديوكورپوراتسياسىنىڭ altynqor.com سايتىنا ەنگىزىلدى.
سالتاناتتى جيىندا ءسوز سويلەگەن مەملەكەتتىك كەڭەسشى «اسىل مۇرا» اۋديوجيناعىنىڭ جارىققا شىعۋى ۇلتتىق ساز ونەرى مۇراسىنىڭ الەمدىك پلاتفورمالاردا قولجەتىمدى ەتىپ، ءتول مادەنيەتىمىزدىڭ دامۋىنا تىڭ سەرپىن بەرەتىنىن اتاپ ءوتتى.
- مەملەكەتتىك تەلەراديوكورپوراتسيانىڭ قورىندا عانا ساقتالعان 1500 ءتۇپنۇسقا تۋىندى الەمدىك مۋزىكالىق پلاتفورمالاردا جاريالانىپ وتىر. بۇل شارا مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدىڭ IV وتىرىسىندا كوتەرگەن ۇلتتىق تسيفرلىق مۇراعات قۇرۋ جونىندەگى باستاماسىن جۇزەگە اسىرۋعا سەپتىگىن تيگىزەدى. مۇنداي جوبالار ۇلتتىق مادەني كونتەنتتى جۇيەلەۋگە جول اشىپ قانا قويماي، ونەرپازداردىڭ جاڭا بۋىنىنا، وسكەلەڭ ۇرپاققا سەنىمدى ءارى باي دەرەك كوزى بولادى. سونداي-اق جاساندى ينتەللەكتىنىڭ جادىن ەداۋىر تولىقتىرادى، - دەدى ەرلان قارين.
جيناق ەلىمىزدەگى ۇلتتىق كىتاپحانالار مەن ونەر ۋنيۆەرسيتەتتەرىنىڭ كىتاپحانالارىنا بەرىلەدى، سونداي-اق ەركىن ساۋداعا شىعارىلادى.
وسىعان دەيىن مەملەكەت كەڭەسشى ەرلان قارين كەشە وتكەن ۇلتتىق قۇرىلتايدىڭ ەرەكشەلىكتەرى مەن پرەزيدەنت كوتەرگەن باستامالاردى اتادى.
