قازاقستاننىڭ گۆينەيا-بيساۋعا ءداندى داقىلداردى ەكسپورتتاۋ مۇمكىندى مول - توقايەۆ

بۇل تۋرالى ەلىمىزگە رەسمي ساپارمەن كەلگەن گۆينەيا-بيساۋ پرەزيدەنتى ۋمارۋ سيسوكۋ ەمبالومەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم- جومارت توقايەۆ ايتتى.

- اۋىل شارۋاشىلىعى سالاسىنداعى سەرىكتەستىك كەلىسسوزدەردەگى باستى تاقىرىپتاردىڭ ءبىرى بولدى. قازاقستاننىڭ گۆينەيا-بيساۋعا ءداندى داقىلدى ەكسپورتتاۋعا قاتىستى مۇمكىندىگى مول ەكەنىنە نازار اۋداردىق. بۇل رەتتە ەلىمىزدىڭ باستاماسىمەن قۇرىلعان ازىق-تۇلىك قاۋىپسىزدىگى جونىندەگى يسلام ۇيىمىنىڭ الەۋەتىن تولىق پايدالانۋعا بولادى. سونىمەن قاتار تاۋ-كەن جانە تابيعي رەسۋرستاردى يگەرۋ ىسىندەگى ىنتىماقتاستىق ماسەلەلەرىن تالقىلادىق. اتاپ ايتقاندا، تەمىر، فوسفات جانە باسقا سيرەك كەزدەسەتىن مينەرال كەنىشتەرىن بارلاۋ جانە يگەرۋ ءۇشىن بىرلەسە جۇمىس ىستەۋگە زور مۇمكىندىك بار، - دەدى قازاقستان پرەزيدەنتى.

مەملەكەت باسشىسى مارتەبەلى مەيمانمەن قازاقستاننىڭ جاڭا تەحنولوگيالار سالاسىنداعى جاڭالىقتارىمەن بولىسكەنىن اتاپ ءوتتى.

- اسىرەسە، سيفرلاندىرۋ، كيبەرقاۋىپسىزدىك جانە فينتەح باعىتىنداعى جەتىستىكتەرىمىزگە توقتالدىم. وسى ورايدا سيفرلىق قىزمەت سالاسىنداعى ىقپالداستىقتى ارتتىرۋدى ۇسىندىم. گۆينەيا-بيساۋدىڭ جوعارى دەڭگەيدەگى دەلەگاتسياسىن كەلەسى جىلى وتەتىن استانا حالىقارالىق فورۋمىنا شاقىردىم. بۇل قازاقستاننىڭ ەكونوميكالىق جانە ينۆەستيتسيالىق الەۋەتىمەن تولىق تانىسۋعا مۇمكىندىك بەرەدى، - دەدى قاسىم- جومارت توقايەۆ.

بۇعان دەيىن مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن گۆينەيا- بيساۋ پرەزيدەنتى ۋمارۋ سيسوكۋ ەمبالونى سالتاناتپەن قارسى العانىن جازعان ەدىك.

كەڭەيتىلگەن قۇرامداعى كەلىسسوز بارىسىندا قاسىم- جومارت توقايەۆ قازاقستان گۆينەيا- بيساۋدى افريكا قۇرلىعىنداعى ماڭىزدى سەرىكتەس رەتىندە قاراستىراتىندىعىن ايتتى.

كەلىسسوزدەر بارىسىندا ەكى ەلدى باسشىلارى بيساۋ پورتى مەن ترانسكاسپي ءدالىزىن ۇشتاستىرۋ جولدارىن زەردەلەۋگە كەلىستى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى