قازاقستاننىڭ ەڭ سۇلۋ ارۋى انىقتالدى

«Miss Qazaqstan-2024» بايقاۋىندا وسكەمەندىك 20 جاستاعى باعىم بالتابايەۆا ەڭ سۇلۋ ارۋ اتاندى. بۇل تۋرالى بايقاۋ ۇيىمداستىرۋشىلارى الەۋمەتتىك جەلىدەگى پاراقشادا ءبولىستى.

«ەركەلىگىمە قاراماستان، مەن وتە ماقساتىما بەرىك جانمىن جانە مۇمكىن ەمەس ەشتەڭە جوق دەپ سەنەمىن. باستىسى - نيەت!» - دەپ جازدى سۇلۋلىق بايقاۋىنىڭ جەڭىمپازى باعىم بالتابايەۆا Instagram پاراقشاسىندا.

باعىم بوس ۋاقىتىن شىعارماشىلىققا، جاڭا نارسەنى ۇيرەنۋگە جانە جاقىندارىمەن بىرگە ۋاقىت وتكىزۋگە ارنايتىنىن ايتتى.

«مەن ادام بويىنداعى مەيىرىمدىلىكتى جانە شىنايىلىقتى ەرەكشە باعالايمىن»، - دەپ قوستى ول.

بايقاۋدا باسقا دا نوميناتسيا يەگەرلەرى ماراپاتتالدى. ولار:

ايدانا ءابىلقاسوۆا، «ۆيتسە-Miss Qazaqstan-2024»؛

توميريس قادىرحان، «جەر ارۋى»؛

دانا الماسوۆا، «عالام ارۋى».

«ميسس قازاقستان» (قازاقستان ارۋى) - بۇل قازاقستانداعى ەڭ بەدەلدى سۇلۋلىق بايقاۋلارىنىڭ ءبىرى. ول جىل سايىن وتكىزىلىپ، قازاقستاننىڭ ەڭ سۇلۋ، دارىندى جانە جان-جاقتى قىزدارىن انىقتاۋعا باعىتتالعان. بايقاۋ العاش رەت 1997-جىلى ۇيىمداستىرىلىپ سودان بەرى ۇزدىكسىز انىقتالىپ كەلەدى.

«قازاقستان ارۋى» جەڭىمپازدارى حالىقارالىق سۇلۋلىق بايقاۋلارىنا، اتاپ ايتقاندا، «ميسس الەم» (Miss World) جانە «ميسس عالام» (Miss Universe) بايقاۋلارىنا قاتىسۋعا مۇمكىندىك الادى.

ەسكە سالايىق، بۇعان دەيىن 2023-جىلى قازاقستان ارۋى اتاعىن سابينا ىدىرىسوۆا جەڭىپ العان بولاتىن. سونداي-اق، بيىل داۋلى شەشىممەن «قازاق ارۋى-2024» بايقاۋىنىڭ جەڭىمپازى بەلگىلى بولعان ەدى.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى