قازاقستاننىڭ رەكوردشى اجەلەرى گيننەس كىتابىنا ەنۋدى كوزدەپ وتىر
«الامان قۇراق» رەسپۋبليكالىق بايقاۋىنا قاتىسقان پەتروپاۆلدىڭ ءۇش تۇرعىنى قازاقستاننىڭ رەكوردتار كىتابىنا ەندى. اجەلەر ەلىمىزدىڭ باسقا قولونەرشىلەرىمەن بىرگە ۇزىندىعى 500 مەتر قۇراق كورپە تىگىپ شىقتى، دەپ حابارلايدى Kazinform.
قازاقستاننىڭ رەكوردتار كىتابىنا ەنگەندەردىڭ ءبىرى - باقىت مۇستافينا. ونىڭ قولونەردى جانىنا سەرىك ەتكەنىنە 50 جىلعا جۋىقتادى ينە- ءجىپ ۇستاۋدى جاستايىنان اناسىنان ۇيرەنگەن باقىت اپا سودان بەرى قۇراق كورپەنىڭ ءتۇر-ءتۇرىن تىككەن. سوندىقتان بايقاۋعا قاتىسۋعا ۇسىنىس تۇسكەندە بىردەن قۇپ العان.
«بۇعان دەيىن «تاقيا- فەستكە» قاتىستىم. سوندىقتان بۇل جولى دا قۋانا ىسكە كىرىستىم. 500 مەترلىك كورپە تىگۋ وڭاي ەمەس. ءارى ءوز قاراجاتىمىزعا ءجۇرىپ- تۇردىق. ءبىراق قانشاما جاڭا اداممەن تانىستىم، تاجىريبە جينادىم. اقتىق سايىسقا 200 قولونەرشى عانا جەتتى»، - دەيدى باقىت مۇستافينا.
200 قولونەرشىنىڭ اراسىندا عاليا جاقينا جانە رايحان سۇراعانوۆا دا بولدى. ماسەلەن رايحان اپايدىڭ نەگىزگى ماماندىعى - مۇعالىم. 26 جىل مەكتەپتە ەڭبەك ەتىپ، بالالاردى قولونەرگە باۋلىدى. زەينەت دەمالىسىنا شىققاننان كەيىن دە سۇيىكتى ىسىنەن قول ۇزبەي، بۇگىندە پەتروپاۆلداعى اتەلەلەردىڭ بىرىندە ەڭبەك ەتەدى.
«بالا كەزىمنەن ءىس تىگۋگە جاقىن بولدىم. اكە- شەشەم دە ونەرلى ادامدار ەدى. بوس وتىرعاندى ۇناتپايمىن، وسىنداي بايقاۋلارعا قاتىسىپ، ۇنەمى ىزدەنىستە جۇرگەن ۇنايدى. بۇل ءبىزدىڭ ۇلتتىق قولونەرىمىز، ونى جاستار اراسىندا ناسيحاتتاۋىمىز كەرەك، بىلگەنىمىزدى ۇيرەتۋىمىز قاجەت»، - دەيدى رايحان سۇراعانوۆا.
پەتروپاۆلدىق قولونەرشىلەر بۇل جەتىستىكپەن توقتاپ قالماق ەمەس. گيننەستىڭ رەكوردتار كىتابىنا ەنۋ ءۇشىن قازىر الەۋمەتتىك جەلى ارقىلى كوماندا جيناپ جاتىر. قاڭتار ايىندا ۇيىمداستىرۋشىلاردان تاپسىرما الىپ، ىسكە كىرىسپەك. قازىردىڭ وزىندە 17 ادام بايقاۋعا قاتىسۋعا تىلەك بىلدىرگەن.
اۆتور
اقەركە داۋرەنبەك قىزى
