قازاقستاننىڭ قىزىل كىتابىنا تاعى 11 جانۋار ءتۇرى ەنگىزىلەدى
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ قازاقستاننىڭ قىزىل كىتابىنا وزگەرىستەر ەنگىزىلەتىنىن ءمالىم ەتتى.
بۇگىنگى تاڭدا قازاقستانداعى جانۋارلاردىڭ سيرەك كەزدەسەتىن جانە جويىلىپ كەتۋ قاۋپى تونگەن تۇرلەر تىزبەسىندە (قىزىل كىتاپ - رەد.) 227 جانۋار ءتۇرى تىركەلگەن، ونىڭ ىشىندە 131 ءتۇرى - ومىرتقالىلار جانە 96 سى ومىرتقاسىزدار.
- قازىرگى ۋاقىتتا مينيسترلىك زوولوگيا ينستيتۋتىنىڭ بيولوگيالىق نەگىزدەمەسىمەن حالىقارالىق تابيعاتتى قورعاۋ وداعىنىڭ كريتەرييلەرىنە سايكەس، تىزبەنى جاڭارتۋ جۇمىستارىن باستادى. ناتيجەسىندە تىزىمنەن 21 ومىرتقاسىز جانۋار ءتۇرىن شىعارۋ مەن 6 ومىرتقاسىز جانە 5 ومىرتقالى جانۋار ءتۇرىن ەنگىزۋ ۇسىنىلدى، - دەدى مينيستر ۇكىمەت ۇيىندە وتكەن باسپا ءسوز ءماسليحاتىندا.
وسىلايشا، ۇلكەن كوز كەسىرتكە، ءامىرشى ينەلىك، نۇكتەلى قانقىزى، كوبەلەك، كارمين سىمىرلارى جانە قوڭىزدىڭ بىرنەشە ءتۇرىن قىزىل كىتاپتان شىعارۋ ۇسىنىلىپ وتىر.
ال كەرىسىنشە، قامىس مىسىعى، اقباس قۇماي، تازقارا، تيان- شان جانە جوڭعار كەسىرتكەلەرىن، قىسقاقاناتتى كورانۋس شەگىرتكەسىن، كوك زيكرونا قوڭىزىن، قاندىاعاش قاندالاسىن جانە سارىشاياننىڭ ءبىرقاتار ءتۇرىن قىزىل كىتاپقا ەنگىزۋ جوسپارلانعان.
سونداي- اق، ەلىمىزدە بيوارتۇرلىلىكتى ساقتاپ قالۋ شارالارىنىڭ ناتيجەسىندە، 2005-2023 -جىلدارى سيرەك كەزدەسەتىن توعاي بۇعىسى، قۇلان، ارقار جانە قاراقۇيرىق پوپۋلياتسياسى كوبەيگەن.
