قازاقستاننىڭ قىرعىز ەكونوميكاسىنا قۇيعان ينۆەستيتسياسى 1,3 ميلليارد دوللارعا ارتقان
استانا. KAZINFORM - سوڭعى 15 جىلدا قازاقستاننىڭ قىرعىز ەكونوميكاسىنا قۇيعان ينۆەستيتسيا كولەمى 1,3 ميلليارد دوللارعا ۇلعايدى. پرەمەر-مينيستر ولجاس بەكتەنوۆ قىرعىز رەسپۋبليكاسى مينيسترلەر كابينەتىنىڭ ءتوراعاسى - پرەزيدەنت اكىمشىلىگىنىڭ باسشىسى ادىلبەك قاسىماليەۆپەن كەزدەسۋدە وسىنداي دەرەك كەلتىردى.
- مەملەكەت باسشىلارى ەكى ەل اراسىنداعى تاۋار اينالىمىن 2030-جىلعا قاراي 3 ميلليارد دوللارعا دەيىن جەتكىزۋ مىندەتىن قويدى. ۇكىمەتتەر وسى مىندەتتى ىسكە اسىرۋ باعىتىندا جۇمىستى جالعاستىرىپ جاتىر. سوڭعى 15 جىلدا قازاقستاننىڭ قىرعىز ەكونوميكاسىنا قۇيعان ينۆەستيتسيا كولەمى 1,3 ميلليارد دوللارعا ۇلعايدى. ۇكىمەتتەر وسى مىندەتتى ىسكە اسىرۋ باعىتىندا جۇمىستى جالعاستىرىپ جاتىر، - دەدى ول.
ۇكىمەت باسشىسى ەكى ارادا مادەني-گۋمانيتارلىق بايلانىستار دا تۇراقتى دامىپ كەلە جاتقانىن اتاپ ءوتتى.
- ەكى ەلدىڭ جاستارى مەن زيالى قاۋىم وكىلدەرى اراسىنداعى ىقپالداستىقتى نىعايتۋعا ەلەۋلى سەرپىن بەرگەن ءبىرقاتار ءىس-شارا وتكىزىلدى. جالپى، ەكىجاقتى بايلانىستاردىڭ ودان ءارى دامۋىنا ۇكىمەتارالىق كەڭەس پەن ءوڭىرارالىق ىنتىماقتاستىق فورۋم سياقتى پلاتفورمالاردىڭ زور ۇلەسىن ايتىپ وتكەن ءجون.
قازاقستان ۇكىمەتى بارلىق باعىت بويىنشا قازاق-قىرعىز ستراتەگيالىق ارىپتەستىگىنىڭ جوعارى ديناميكاسىن قولداۋعا قاشاندا دايىن، - دەدى ولجاس بەكتەنوۆ.
