قازاقستاننىڭ قاي وڭىرىندە اۋىز سۋدىڭ ساپاسى ناشار
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ەلىمىزدىڭ قاي وڭىرىندە اۋىز سۋ ساپاسى ناشار ەكەنىن ايتتى، دەپ حابارلايدى Kazinform.
«اۋىز سۋعا ۇنەمى مونيتورينگ جۇرگىزىلەدى. ەگەر ول ىشۋگە جارامسىز بولسا، قولدانىلمايدى. اۋىز سۋ ناشار ءارى ونى ىشۋگە بولمايدى دەپ ايتا المايمىز. ويتكەنى، قاتاڭ باقىلاۋ جۇرگىزىلەدى. جالپى، جۇيە دۇرىس جۇمىس ىستەپ تۇرسا، وندا ونىڭ ساپاسى جاقسى بولادى»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
وسى ورايدا ب ا ق وكىلدەرى ەلىمىزدىڭ قاي وڭىرىندە اۋىز سۋدىڭ ساپاسى ناشار ەكەنىن سۇرادى.
ساۋالعا جاۋاپ بەرگەن مينيستر اۋىز سۋ ساپاسىنا قاتىستى كەيبىر وڭىردە پروبلەما بارىن جاسىرا المادى.
«ولار - ورتالىق جانە باتىس قازاقستان. بۇل جاقتا شىنىمەن دە اۋىز سۋمەن قامتاماسىز ەتۋدە پروبلەما بار. وڭتۇستىك جانە شىعىس وڭىرلەردە جاعداي ءبىرشاما جاقسى»، - دەدى نۇرجان نۇرجىگىتوۆ.
