قازاقستاننىڭ حالىقارالىق قاتىناستاردا ءىس-قيمىلى جان-جاقتى نىعايىپ جاتىر - گەننادي شيپوۆسكيح
سەناتور گەننادي شيپوۆسكيح قازاقستانعا رەسەي پرەزيدەنتى ۆلاديمير پۋتين رەسمي ساپارمەن كەلۋىنە قاتىستىتى پىكىر ءبىلدىردى، دەپ حابارلايدى Kazinform.
«قازىر استانا بارشا الەم ءۇشىن ديپلوماتيالىق ورتالىقتىڭ الاڭىنا اينالعانى ءسوزسىز. مۇنى تەك قازاقستان حالقى عانا ەمەس، كۇللى الەم جۇرتشىلىعى كورىپ وتىر. جاقىندا عانا ەلىمىزگە فرانتسيا پرەزيدەنتى ەممانيۋەل ماكرون، تۇركيا پرەزيدەنتى رەجەپ تاييپ ەردوعان، سونداي-اق ورتالىق ازياداعى كورشىلەس ەلدەردىڭ باسشىلارى كەلسە، بۇگىن رەسەي پرەزيدەنتى ۆلاديمير پۋتين رەسمي ساپارمەن كەلىپ جاتىر. اتاپ ايتقاندا، وسىنىڭ ءبارى قازاقستاننىڭ حالىقارالىق قاتىناستار باعىتىندا ءىس-قيمىلى جان-جاقتى ءارى الەمدىك دەڭگەيدە نىعايىپ جاتقانىن ءبىلدىرىپ وتىر. بىرىنشىدەن، وسى بويىنشا ءبىزدى ەشكىم ماجبۇرلەپ جاتقان جوق. مۇنىڭ ءبارى ءبىزدىڭ ديپلوماتيالىق جەتىستىگىمىز»، - دەدى گەننادي شيپوۆسكيح.
سەناتوردىڭ ايتۋىنشا، مەملەكەت باسشىسى قاسىم-جومارت توقايەۆ ەلىمىزدىڭ مۇددەسىنە قاتىستى، ياعني ەكونوميكالىق ءارى ينۆەستيتسيالىق احۋالىن نىعايتۋعا باعىتتالعان قادامداردى جاساپ جاتىر.
«سوندىقتان بۇگىنگى جوعارى دەڭگەيدە وتەتىن كەزدەسۋلەردە ءتۇرلى سالاداعى تاقىرىپتار قوزعالاتىنى انىق. وسىنىڭ بارلىعى ەلىمىزدىڭ مۇددەسىن ودان ءارى نىعايتۋعا، سونداي-اق حالىقارالىق ارەناداعى دەڭگەيىمىزدى كۇشەيتۋگە وڭ ىقپال ەتەدى»، - دەدى دەپۋتات.
بۇگىن قازاقستانعا رەسمي ساپارمەن رەسەي پرەزيدەنتى ۆلاديمير پۋتين كەلگەنىن ايتا كەتەيىك. ساپار بارىسىندا ەكى ەل باسشىلارى كەلىسسوز جۇرگىزىپ، قازاقستان مەن رەسەي اراسىنداعى ستراتەگيالىق سەرىكتەستىكتىڭ وزەكتى ماسەلەلەرىن تالقىلايدى دەپ جوسپارلانعان.
