قازاقستاننىڭ اۆياتسيالىق اكىمشىلىگىنە نەگە كىل شەتەلدىك ماماندار باسشى بولادى

قازىرگى تاڭدا «قازاقستاننىڭ اۆياتسيالىق اكىمشىلىگى» ا ق باسشىسى - رۋمىنيالىق توپ-مەنەدجەر كاتالين رادۋ. 2019 -جىلدان 2022 -جىلعا دەيىن ونى اعىلشىن پيتەر گريففيتس باسقارعان. پيتەر گريففيتس ءوز ەركىمەن جۇمىستان كەتكەن كەزدە ونىڭ مىندەتىن ۋاقىتشا اتقارعان ورىنباسارى ليندا ورلەدي دە شەتەلدىك مامان. باسشىلىق قىزمەتكە شەتەلدىك مامانداردىڭ ءجيى تارتىلۋى ەلىمىزدە اۆياتسيالىق باسقارۋ سالاسىندا بىلىكتى ماماندار تاپشىلىعىن بىلدىرە مە؟ نە سەبەپتى وزگە ەلدەردەن باسشى ماماندار تارتىلادى؟ Kazinform اگەنتتىگى وسى ساۋالداردى ق ر كولىك مينيسترلىگىنە جولداعان ەدى.

- 2019 -جىلى «قازاقستاننىڭ اۆياتسيالىق اكىمشىلىگى» ا ق %100 مەملەكەتتىڭ قاتىسۋىمەن قۇرىلدى. ۇيىمنىڭ نەگىزگى فۋنكسيالارى - ۇشۋ قاۋىپسىزدىگى مەن اۆياتسيالىق قاۋىپسىزدىك سالاسىنداعى تەحنيكالىق باقىلاۋ جانە قاداعالاۋ. قىزمەتكەرلەرگە جەتەكشى حالىقارالىق اۆياتسيالىق ۇيىمدارمەن سالىستىرۋعا بولاتىن ءتيىستى ەڭبەك جاعدايلارى جاسالدى. ناتيجەسىندە سالانى تابىستى دامىتۋ ءۇشىن جوعارى بىلىكتى شەتەلدىك ساراپشىلاردى تارتۋ مۇمكىندىگى بارى انىقتالدى. كاسىپورىندى ءتيىمدى باسقارۋ ماقساتىندا ازاماتتىق اۆياتسيا سالاسىندا وزىق حالىقارالىق ۇيىمداردا جۇمىس تاجىريبەسى بار شەتەلدىك ماماندار تارتىلادى. قۇزىرەتتى شەتەلدىك مامانداردى تارتۋ جالپى الەمدىك تاجىريبە سانالادى (سينگاپۋر، ب ا ءا جانە ت. ب.). مۇنداي ماماندار جەرگىلىكتى ماماندار اراسىنان جاڭا كادرلاردىڭ قالىپتاسۋىنا وڭ ىقپال ەتىپ، تاجىريبە الماسۋعا اتسالىسۋدا. اتالعان مودەل جەتەكشى ەۋروپالىق ەلدەر مەن بريتاندىق اۆياتسيا ورگاندارىنا ۇقساس، - دەپ جازىلعان ۆەدومستۆونىڭ رەسمي جاۋابىندا.

مينيسترلىك قابىلدانعان شارالار باقىلاۋ مەن قاداعالاۋدىڭ تيىمدىلىگىن ارتتىرۋعا، قازاقستاننىڭ ازاماتتىق اۆياتسياسىنىڭ حالىقارالىق ارەناداعى ءيميدجىن جاقسارتۋعا مۇمكىندىك بەرەتىنىن اتاپ وتكەن.

- حالىقارالىق ازاماتتىق اۆياتسيا ۇيىمى (ي ك ا و) جانە ەۋروپالىق كوميسسيا قازاقستاننىڭ جاڭا مودەلدى ەنگىزۋ بويىنشا جۇمىسىندا ىلگەرىلەۋ بارىن اتاپ ءوتتى. 2021 -جىلعى 2-11-تامىز ارالىعىندا ي ك ا و- نىڭ ۇيلەستىرىلگەن ۆاليداتسيالىق ميسسياسى (ICVM) شەڭبەرىندە يكاو اۋديتورلارىنىڭ سالانى تاۋەلسىز تەكسەرۋى جۇرگىزىلدى. وندا قازاقستان ۇشۋ قاۋىپسىزدىگىن قامتاماسىز ەتۋ دەڭگەيىن %74- دان %82- عا دەيىن ارتتىرعانى انىقتالدى (سالىستىرۋ ءۇشىن: گەرمانيا - 93، ۇلى بريتانيا - 93، دانيا - 84، پولشا - 82، ازەربايجان - 79، رەسەي - 69، وزبەكستان - 59، ورتاشا، الەمدە - 67، ورتاشا، ەۋروپا – 77 پايىز)، - دەلىنگەن حابارلامادا.

ايتا كەتەيىك، بۇعان دەيىن نۇرتورە ءجۇسىپ ءوزىنىڭ دەپۋتاتتىق ساۋالىندا ۇكىمەتكە ازاماتتىق اۆياتسيانىڭ نەگىزگى پروبلەمالارىن اتاپ كورسەتكەن ەدى.

سونىمەن قاتار، ەلىمىزدە ازاماتتىق اۆياتسيانى دامىتۋ ستراتەگياسى قاشان قۇرىلاتىنى بەلگىلى بولدى.

بۇدان بولەك، ازاماتتىق اۆياتسيا اكادەمياسىنا ەرەكشە مارتەبە بەرىلەتىنى ايتىلدى.

اۆتور

ەربول جانات

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى