قازاقستاننىڭ اسكەري وقۋ ورىندارىندا جاڭا ماماندىقتار پايدا بولدى
استانا. KAZINFORM - ەلىمىزدىڭ اسكەري وقۋ ورىندارىندا ق ر قارۋلى كۇشتەردىڭ قاجەتتىلىگىن وتەۋ ماقساتىندا دايارلاۋ ماماندىقتارىنىڭ تىزبەسى ەداۋىر كەڭەيتىلدى. بۇل تۋرالى ق ر قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى جۇمابەك احمەتوۆ ايتىپ بەردى.
«اۋە قورعانىس كۇشتەرى اسكەري ينستيتۋتىندا «ۇشقىشسىز ۇشۋ اپپاراتىن باسقارۋ» ماماندىعى بويىنشا كادر دايارلانادى. العاش رەت اسكەري تەڭىز ماماندىقتارى بويىنشا ىرىكتەۋ جۇرگىزىلەدى. راديوەلەكترونيكا جانە بايلانىس اسكەري-ينجەنەرلىك ينستيتۋتىنا «راديوەلەكتروندى بارلاۋ جانە راديوەلەكتروندى كۇرەس»، «اقپاراتتىق قورعاۋ» جانە «اۆتوماتتاندىرىلعان باسقارۋ جۇيەلەرى» ماماندىقتارى بولادى»، - دەدى جۇمابەك احمەتوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سونىمەن بىرگە، راديوەلەكترونيكا جانە بايلانىس اسكەري-ينجەنەرلىك ينستيتۋتىنا «اسكەري ىستەگى جۋرناليستيكا جانە جۇرتشىلىقپەن بايلانىس» جانە «اسكەري ىستەگى ديريجەرلىق» جاڭا ماماندىقتارى بويىنشا قابىلداۋ جۇرگىزۋ جوسپارلانىپ وتىر.
«وتاندىق وقۋ ورىندارىندا اسكەري مامانداردى دايارلاۋ ماماندىقتارىنىڭ سپەكترىن ۇلعايتۋ ارقىلى شەتەلدە اسكەري كادرلاردى دايارلاۋ 100 دەن 60 قا دەيىن قىسقارتىلدى. وسىلايشا، ءبىزدىڭ اسكەري ءبىلىم بەرۋ جۇيەسى قالىپتاستى جانە زاماناۋي تالاپتارعا جاۋاپ بەرەدى»، - دەدى ج. احمەتوۆ.
ايتا كەتەيىك، قر قورعانىس مينيسترلىگىنىڭ اسكەري ءبىلىم بەرۋ جۇيەسىنە 9 اسكەري وقۋ ورنى كىرەدى. ورتا ءبىلىم بويىنشا 3 رەسپۋبليكالىق «جاس ۇلان» مەكتەبى، استانا مەن شۋچە قالالارىندا 2 تەحنيكالىق جانە كاسىپتىك اسكەري كوللەدج بار.
جوعارى بىلىمدە - قۇرلىق اسكەرلەرىنىڭ اسكەري ينستيتۋتى، اۋە قورعانىس كۇشتەرى اسكەري ينستيتۋتى جانە راديوەلەكترونيكا جانە بايلانىس اسكەري-ينجەنەرلىك ينستيتۋتى مامانداردى دايارلايدى. ال جوعارى وقۋ ورنىنان كەيىنگى (ماگيستراتۋرا جانە دوكتورانتۋرا) بىلىمدە - ۇلتتىق قورعانىس ۋنيۆەرسيتەتى بار.
بۇعان دەيىن سپيكەر قازاقستانداعى اسكەري وقۋ ورىندارىنا قۇجات قابىلداۋ مەرزىمى ۇزارتىلعانىن ايتقان ەدى.
