قازاقستاننىڭ اگرارلىق الەۋەتىن تولىق ىسكە اسىرۋعا اتسالىسۋعا مۇددەلىمىز - نيدەرلاند ەلشىسى
استانا. KAZINFORM - نيدەرلاند كورولدىگىنىڭ قازاقستانداعى ەلشىسى نيكو سحەرمەرس ەكى ەلدىڭ اراسىنداعى اگرو ونەركاسىپ بايلانىستارى قالاي دامىپ جاتقانىن ايتتى.
- ءوزىم وقىعان سوڭعى زەرتتەۋدىڭ دەرەگىنە سۇيەنسەك، قازاقستاننىڭ الەمدىك ازىق-تۇلىك نارىعىنا 25 پايىز ۇلەس قوساتىنداي الەۋەتى بار. نيدەرلاند وسى الەۋەتتىڭ ىسكە اسۋىنا اتسالىسقىسى كەلەدى. نيدەرلاند تەحنولوگيالارى قازاقستاندا سالاۋاتتى ازىق-تۇلىك ءوندىرىسىن دامىتۋعا قولدانىلعانىنا مۇددەلىمىز. قولىمىزدا بار ءبىلىمدى، تەحنولوگيالاردى بولىسۋگە ءازىرمىز. ول ءۇشىن ەكى جاقتىڭ ساراپشىلارى تىعىز بايلانىس ورناتۋ كەرەك. قازاقستان ءوز ايماعىن عانا ساپالى ازىق-تۇلىكپەن قامتىپ قويماي، الەمدەگى ازىق-تۇلىك قاۋىپسىزدىگىنە ۇلەس قوسا الادى، - دەدى ول استاناداعى حالىقارالىق گۇل كورمەسىنىڭ اشىلۋ سالتاناتى الدىندا Kazinform تىلشىسىنە بەرگەن شاعىن سۇحباتىندا.
ونىڭ ايتۋىنشا، نيدەرلاند كومپانيالارى قازاقستاندىق ارىپتەستەرىمەن سۋ جانە توك ۇنەمدەيتىن تەحنولوگيالاردى ءبولىسۋ ماسەلەسىن تالقىلاۋعا دايىن.
- وسىندا وتەتىن گۇل كورمەسىنە نيدەرلاند ەلىنەن جىل سايىن جاڭا كومپانيالار قوسىلىپ جاتقانىن كورىپ وتىرمىز. اسىرەسە قازاقستاندىق فەرمەرلەرگە قۇرعاق جانە جاڭبىرلى كليماتتارعا بەيىمدەلگەن گۇلدەر مەن داقىل تۇقىمدارى قىزىقتى بولادى دەپ ويلايمىن. نيدەرلاند دەلەگاتسياسىنىڭ قۇرامىندا جەتەكشى تىڭايتقىش وندىرۋشىلەر دە بار. سۋ ۇنەمدەۋ، توك ۇنەمدەۋ تەحنولوگياسىن ۇسىناتىن كومپانيالار دا قازاقستانعا ينۆەستيتسيا سالۋ ماسەلەلەرىن پىسىقتاۋعا دايىن.
مەن ءوزىمىزدىڭ كومپانيالارعا دا، قازاقستان كومپانيالارىنا دا ۇنەمى ايتىپ جۇرەمىن. ەكى ارادا تۋىنداۋى مۇمكىن كەز كەلگەن ماسەلەنى، كەدەرگىنى شەشۋگە بولادى. ياعني، نيدەرلاند ەلىنە بارعان قازاقستاندىق كاسىپكەر نەمەسە قازاقستانعا كەلگەن نيدەرلاندىق كاسىپكەر تاپ بولعان ماسەلەسىمەن جالعىز قالمايدى. ەلشىلىكتەر كەز كەلگەن ماسەلەنى جەرگىلىكتى ورگاندارمەن بىرلەسە وتىرىپ رەتتەۋگە كومەكتەسەدى. ول جاعىنان جۇمىس جولعا قويىلعان، - دەيدى ەلشى.
اۋىل شارۋاشىلىعى ۆيتسە-ءمينيسترى ازات سۇلتانوۆتىڭ ايتۋىنشا، قازاقستان كەلەشەكتە مال سانىن نيدەرلاند ادىسىمەن رەتتەۋى مۇمكىن.
اۆتور
ەسىمجان ناقتىباي
