قازاقستاننىڭ 400 گە جۋىق ديپلوماتى سيرەك تىلدەردى مەڭگەرگەن
استانا. KAZINFORM - ەلىمىزدىڭ 400 گە جۋىق ديپلوماتى سيرەك تىلدەردى مەڭگەرگەن. بۇل تۋرالى سەناتتىڭ جالپى وتىرىسىندا ق ر سىرتقى ىستەر ءمينيسترىنىڭ ورىنباسارى الىبەك باقايەۆ ءمالىم ەتتى.
- قازىرگى كەزدە سىرتقى ىستەر مينيسترلىگىنىڭ ورتالىق اپپاراتىندا 139 ادام سيرەك تىلدەردى مەڭگەرگەن، ال شەتەلدەگى وكىلدىكتەرىمىزدە سيرەك تىلدەردى بىلەتىن ديپلوماتتاردىڭ سانى 234 كە جەتتى. اتاپ ايتقاندا، سيرەك تىلدەر ءتىزىمى سىرتقى ىستەر ءمينيسترىنىڭ بۇيرىعىمەن بەكىتىلەدى. وسى تىزىمگە 23 ءتىل قوسىلدى، - دەدى ءا. باقايەۆ دەپۋتاتتاردىڭ سۇراعىنا جاۋاپ بەرە وتىرىپ.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ديپلوماتيالىق قىزمەت، حالىقارالىق شارتتار جانە دامۋعا رەسمي كومەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.
قۇجات اياسىندا ديپلوماتيالىق قىزمەتشىلەردىڭ شەت تىلدەرىن بىلگەنى ءۇشىن تولەمدەردى وزگەرتۋ ەسكەرىلگەن. قولدانىستاعى زاڭناماعا سايكەس، ديپلوماتيالىق قىزمەتكە كىرۋ كەزىندە شەت تىلدەردى ءبىلۋ مىندەتتى، سوندىقتان تولەمدەر سيرەك تىلدەردى بىلگەنى ءۇشىن عانا جۇزەگە اسىرىلادى. بۇل وزگەرىس تە رەسپۋبليكالىق بيۋدجەت قاراجاتىن ۇنەمدەۋگە باعىتتالعان.
اۆتور
رۋسلان عابباسوۆ
