قازاقستاننىڭ 20 ميلليونىنشى تۇرعىننىڭ كىم ەكەنى بەلگىلى بولدى
14-قاراشادا قازاقستان رەسپۋبليكاسىنىڭ حالىق سانى 20 ميلليون ادامعا جەتتى، - دەپ حابارلايدى قازاقپارات ۇلتتىق ستاتيستيكا بيۋروسىنا سىلتەمە جاساپ.
20 ميلليونىنشى ازاماتتىڭ تۋعان كۇنى بارلىق قولدا بار دەموگرافيالىق دەرەكتەردى ەسكەرە وتىرىپ ايقىندالدى: قازاقستان رەسپۋبليكاسىنا تۇراقتى تۇرۋعا كەلگەن جانە ودان شىققان، تۋعاندار مەن قايتىس بولعانداردىڭ سانى. بۇرىن حالىق سانى تۋرالى مالىمەتتەر قولمەن وڭدەلەتىن جانە بۇل كوپ ۋاقىتتى قاجەت ەتەتىن. مەملەكەتتىك اقپاراتتىق جۇيەلەردىڭ ينتەگراتسياسى بۇل پروتسەستى جەدەلدەتۋگە جانە 20 ميلليونىنشى ازاماتتىڭ تۋعان كۇنىن جوعارى دالدىكپەن جانە قىسقا مەرزىمدە انىقتاۋعا مۇمكىندىك بەردى.
حالىقتىڭ دەرەكتەر بازاسىنىڭ كورسەتكىشتەرىنە سايكەس، 2023 -جىلعى 14-قاراشادا تاڭعى ساعات 8.10 دا تۋعان 5 بالا ەلىمىزدىڭ 20 ميلليونىنشى تۇرعىنى اتاندى. قازاقستاننىڭ مەرەيلى ازاماتتارى ۇلىتاۋ، جەتىسۋ، اتىراۋ، اقمولا جانە تۇركىستان وبلىستارىندا دۇنيەگە كەلدى. ولاردىڭ ىشىندە 3 ۇل جانە 2 قىز بار.
ەستەرىڭىزگە سالا كەتەيىك، 1991 -جىلى قازاقستان رەسپۋبليكاسىنىڭ حالىق سانى 16,4 ميلليون ادامدى قۇرادى. تاۋەلسىزدىك جىلدارىندا ەل حالقى 22,3 پايىز ءوستى. ماسەلەن، 2022 -جىلى 1991 -جىلمەن سالىستىرعاندا تۋۋ سانى 353,2 مىڭنان 403,9 مىڭ ادامعا دەيىن نەمەسە 14,7 پايىز ءوستى.
بالا تۋۋدىڭ ەڭ جوعارى ءمانى 2021 -جىلى تىركەلىپ، 446 مىڭ بالانى قۇرادى. تابيعي ءوسىمنىڭ ارتۋى، ونىڭ ىشىندە نارەستە ءولىمىنىڭ ازايۋى ناتيجەسىندە قامتاماسىز ەتىلدى. جالپى ءولىم- ءجىتىم 1991 -جىلعى 8,20 دان 2022 -جىلى 1000 تۇرعىنعا شاققاندا 6,8 ادامعا دەيىن تومەندەدى. سابيلەر ءولىمىنىڭ كوەففيتسيەنتى 3,5 تەن استام ەسە تومەندەدى، 1991 -جىلعى 27,3 جاعدايدان 2022 -جىلى تۋىلعان 1000 ادامعا شاققاندا 7,7 جاعدايعا دەيىن.
حالىقتىڭ 1000 ادامعا شاققانداعى تۋۋ كورسەتكىشىن كورسەتەتىن جالپى تۋۋ كوەففيتسيەنتى تاۋەلسىزدىك جىلدارىندا 1991 -جىلعى 21,6 دان 2021 -جىلى 23,6 عا دەيىن ءوستى. 2022 -جىلى بۇل كورسەتكىش 20,7 بولدى. ەڭ ماڭىزدى دەموگرافيالىق كورسەتكىشتەردىڭ ءبىرى بولىپ تابىلاتىن تۋۋدىڭ جيىنتىق كوەففيتسيەنتى* 1991 -جىلعى 2,7 دەن 1999 -جىلى 1,8 گە دەيىن تومەندەدى. كەيىننەن ونىڭ بىرتىندەپ ءوسۋى بايقالدى. 2022 -جىلى تۋۋدىڭ جالپى كوەففيتسيەنتى 1 ايەلگە 3,05 بالانى قۇرادى.
ورتاشا ءومىر ءسۇرۋ ۇزاقتىعى 1991 -جىلمەن سالىستىرعاندا 2022 -جىلى 6,8 جىلعا ءوستى، بۇل رەتتە ەرلەر اراسىندا 7,7 جىلعا، ايەلدەردە - 6 جىلعا ءوستى. وسىلايشا، 2022 -جىلى قازاقستاندا ءومىر ءسۇرۋ ۇزاقتىعى 74,4 جىلدى قۇرادى. بۇل كورسەتكىش پاندەمياعا دەيىنگى دەڭگەيدەن 1,3 -جىلعا اسادى.
