قازاقستاننىڭ 2 مىڭ مەكتەبى يلون ماسكتىڭ ينتەرنەتىنە قوسىلادى
كەلەسى جىلى قازاقستاندا يلون ماسكتىڭ Starlink ينتەرنەتىنە رۇقسات بەرىلۋى مۇمكىن. بۇل تۋرالى سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى باعدات مۋسين ايتتى، دەپ حابارلايدى Kazinform.
«ءبىز قازىر Starlink كومپانياسىمەن پيلوتتىق جوبانى جۇزەگە اسىرىپ جاتىرمىز. قازىر وسى جوبا ارقىلى 10 اۋىلدىق مەكتەپتى قوسامىز، جارتى جىلدا 2 مىڭ مەكتەپتى قوسۋدى جوسپارلاپ وتىرمىز. ياعني ينتەرنەتى وتە ءالسىز، ءبىلىم بەرۋ جۇيەسىن جاڭعىرتۋعا جارامايتىن سەكۋندىنا 4 مەگابيت مەكتەپتەردى تاڭدايمىز. زاڭنامالىق شەكتەۋلەر شىنىمەن دە بار جانە بۇل شەكتەۋلەر تەك قازاقستاندا عانا ەمەس، قازىر بارلىق ەلدەر بايلانىس سالاسىن رەتتەيتىن زاڭنامانى قايتا قاراۋدا. Starlink جاڭا بايلانىس تەحنولوگياسى بولعاندىقتان، ءۇش جىل ولار بايلانىس قىزمەتتەرىن ۇسىنۋ ءۇشىن جەرگىلىكتى جەردە جابدىق ورناتىپ، بايلانىس جەلىلەرىمەن رەتتەلۋى كەرەك ەدى. قازىر ولار تيىمدىلىكتى ارتتىرۋ جولدارىن ىزدەپ، عارىشتا ەڭ جاقسى جەرسەرىك بايلانىسىن جاسادى جانە سوعان سايكەس قىزمەت كورسەتە الاتىن ەلدەر اۋماعىندا جابدىق ورناتۋ قاجەتتىلىگى بولماي قالدى»، - دەدى باعدات مۋسين.
مينيستر وسى وزگەرىستەردى ەنگىزۋ ءۇشىن پيلوتتى جوبانى جۇزەگە اسىرىپ جاتقانىن، ونىڭ شەڭبەرىندە زاڭناماعا ەنگىزىلۋى ءتيىس نورمالار ازىرلەنەتىنىن جەتكىزدى. قازىرگى ۋاقىتتا قازاقستان اۋماعىندا Starlink تەحنولوگياسىن قولدانۋعا زاڭ جۇزىندە رۇقسات بەرىلمەگەن.
«ءبىز كەلەسى جىلى وسى جاعدايدى رەتتەۋدى جوسپارلاپ وتىرمىز. ءبىرىنشى نەمەسە ەكىنشى جارتىجىلدىقتا دەپ ناقتى ايتا المايمىن، ويتكەنى ءبارى پارلامەنت ماجىلىسىنە بايلانىستى. ەگەر ءماجىلىس قولداسا، قابىلدانادى»، - دەدى ب. مۋسين.
اۆتور
ايجان سەرىكجان قىزى
