قازاقستاننان تازىنى باسقا ەلگە شىعارۋعا تولىق تىيىم سالىنۋى مۇمكىن
استانا. KAZINFORM - سەناتور بيبىگۇل جەكسەنباي ءوزىنىڭ دەپۋتاتتىق ساۋالىندا قازاق تازىسىن ساقتاۋ جانە قورعاۋ ماسەلەسىن كوتەردى.
- قازاقتىڭ قۇماي تازىسى مادەني مۇرانىڭ ءبىر بولىگى عانا ەمەس، سونىمەن بىرگە ۇلتتىق بىرەگەيلىكتىڭ ماڭىزدى سيمۆولى. تازى تۇقىمنىڭ تازالىعىن ساقتاۋ جانە ونىڭ شەتەلگە باقىلاۋسىز شىعارىلۋىن بولدىرماۋ ءۇشىن قوسىمشا ءتيىستى وزگەرىستەر قاجەت ەكەنىن ماماندار كوتەرىپ وتىر. كوپتەگەن ەلدەر بىرەگەي يت تۇقىمدارىن قورعاۋ ءۇشىن مەملەكەتتىك دەڭگەيدەگى ءىس- شارالاردى قاراستىرعان. ماسەلەن، جاپونيادا اكيتا- ينۋدى، تۇركيادا كانگالدى، تۇرىكمەنستاندا الابايدى سىرتقا اكەتۋگە تىيىم سالىنعان. قازاقستاندا دا بۇل جاعدايدا قاتاڭ شارلاردى قولعا العان ءجون. قۇمايدى ەكسپورتتاۋعا تولىق تىيىم سالۋ نەمەسە ءتيىستى مەملەكەتتىك ورگانداردان ارنايى رۇقسات الۋىن مىندەتتەۋ ماڭىزدى، - دەدى ب. جەكسەنباي ۇكىمەت باسشىسىنىڭ اتىنا جولداعان ساۋالىندا.
ونىڭ ايتۋىنشا، تازىنىڭ گەنوفوندىن قورعاۋ جانە باسقا يت تۇقىمدارىمەن بۋدانداستىرۋعا جول بەرمەۋ ءۇشىن شۇعىل شارالار قاجەت.
- ۇلتتىق كينولوگتار قاۋىمداستىعى وكىلدەرىنىڭ پىكىرىنشە، ەلىمىزدە تازى مەن توبەت كۇنى دەپ بەلگىلەنگەن 3-قىركۇيەك تاريحي ءارى مادەني داستۇرگە سايكەس كەلمەيدى. ءداستۇر بويىنشا قازاقستان اڭ اۋلاۋ ماۋسىمى قاراشا ايىندا العاش قار تۇسكەندە - قانسوناردا باستالادى. تازى مەن توبەت كۇنىن وسى كەزەڭگە ورايلاستىرىپ، قاراشانىڭ ءبىرىنشى جەكسەنبىسىنە بەلگىلەۋدى قاراستىرعان ءجون. بۇل ءوز كەزەگىندە مەرەكەنىڭ اڭشىلىق ءارى ساياتشىلىق داستۇرلەرىمەن بايلانىسىن كۇشەيتەدى. وسى ورايدا تازى مەن توبەت كۇنىن ءداستۇرلى اڭشىلىق ماۋسىمىنىڭ رەسمي اشىلۋىمەن بايلانىستىرا وتىرىپ، قاراشانىڭ ءبىرىنشى اپتاسىنا اۋىستىرۋدى قاراستىرۋ ۇسىنىلادى، - دەدى دەپۋتات.
سەناتوردىڭ سوزىنە قاراعاندا، الەمدىك دەڭگەيدە قازاق تازىسىن برەند رەتىندە ناسيحاتتاۋ باعىتىندا ءداستۇرلى قانسوناردا ارنايى حالىقارالىق فەستيۆالىن وتكىزىپ تۇرۋ، مۇحتار ماعاۋيننىڭ «تازىنىڭ ءولىمى» شىعارماسى نەگىزىندە كوركەم فيلم ءتۇسىرۋدى قاراستىرعان ءجون.
ەسكە سالساق، ەلىمىزدە تازى جانە توبەت كۇنىن مەرەكەلەۋ ۇسىنىلدى. بۇل تۋرالى «اشىق ن ق ا» پورتالىندا بۇيرىق جاريالاندى.
