قازاقستاندىقتاردىڭ ورتاشا جالاقىسى دوللارمەن ەسەپتەگەندە 10 جىل بۇرىنعى دەڭگەيدە قالعان
قازاقستاندىقتاردىڭ ورتاشا جالاقىسى دوللارمەن ەسەپتەگەندە 10 جىل بۇرىنعى دەڭگەيدە قالعان، - دەپ حابارلايدى DataHub FCBK Telegram ارناسى.
2023-جىل III توقساننىڭ قورىتىندىسى بويىنشا، ءبىر قىزمەتكەردىڭ ورتاشا ايلىق جالاقىسى 350542 تەڭگە بولعان. بۇل دوللارمەن شامامەن 770 دوللار.
10 جىل بۇرىن دا وسى كورسەتكىش بولعان. ياعني 2013-جىلى شىلدەدە 739 دوللار بولعان.
ەسكە سالايىق، 26- قازاندا قازاقستاندىقتاردىڭ بيىلعى ورتاشا جالاقىسى بەلگىلى بولعان ەدى.
ۇلتتىق ستاتيستيكا بيۋروسى ساۋىردە تولىق جۇمىس ىستەگەن قىزمەتكەرلەردى قامتىپ، زەرتتەۋ جۇرگىزگەن. زەرتتەۋدە بارلىق قوسىمشا اقى، ۇستەمەاقى، سىياقى، سالىق پەن زەينەتاقى اۋدارىمى ەسكەرىلگەن.
زەرتتەۋ قورىتىندىسىنا سايكەس، كاسىپورىندار مەن ۇيىمدار بويىنشا ساۋىردە تولىق جۇمىس ىستەگەن قىزمەتكەرلەر سانى 3437300 ادام بولعان. ونىڭ ىشىندە ەرلەر (1683800 ادامدى) 49 پايىز، ايەلدەر (1753500 ادامدى) 51 پايىزدى كورسەتكەن.
ورتاشا ايلىق جالاقى، ياعني 70000 تەڭگەنى قىزمەتكەرلەردىڭ جالپى سانىنان 1,5 پايىزى، 70000 نان 150000 تەڭگەگە دەيىن 22,8 پايىزى، 150000 نان 300000 تەڭگەگە دەيىن 36,2 پايىزى، 300000 نان 600000 تەڭگەگە دەيىن 30,8 پايىزى، 600000 نان 900000 تەڭگەگە دەيىن 5,5 پايىزى، 900000 نان 1200000 تەڭگەگە دەيىن 1,7 پايىزى، 1200000 تەڭگەدەن 1500000 تەڭگەگە دەيىن 0,6 پايىزى، 1500000 تەڭگەدەن جوعارى جالاقىنى 0,9 پايىزى العان.
سونداي-اق، بيۋرو قىزمەتكەرلەرى جالاقىنىڭ مەديانالىق ءمانىن ەسەپتەپتى. 2023-جىلى ونىڭ مولشەرى 251356 تەڭگە بولعان (2022-جىلى 204149 تەڭگە بولعان ەدى).
ايتا كەتەيىك، مەديانا - بارلىق جالاقى مولشەرىن ءوسۋ رەتىمەن ورنالاستىرعانداعى ءتىزىمنىڭ ورتالىق ءمانى، ناتيجەسىندە بارلىق جۇمىسشىنىڭ جارتىسى ودان كوپ، ال ەكىنشى جارتىسى ودان از الادى دەگەن ءسوز.
بۇدان بولەك، قىزمەتكەرلەر جالاقىسىنىڭ ءمودالدى ءمانى 81377 تەڭگە بولادى. بۇل - جۇمىسشىلار اراسىندا نەعۇرلىم ءجيى كەزدەسەتىن جالاقى مولشەرى.
