قازاقستاندىقتارعا ەۋروپاعا بارۋ جەڭىلدەمەك: نە وزگەرەدى؟
ەۋروپا قازاقستاندىقتارعا ۆيزا بەرۋ پروتسەسىن جەڭىلدەتەدى. سىرتقى ىستەر مينيسترلىگى ەگجەي-تەگجەيىن ايتتى.
قازاقستان مەن ەۋروپا وداعى ۆيزا تالاپتارىن ءوزارا وڭايلاتۋ تۋرالى كەلىسىمگە قول قويۋدى جوسپارلاپ وتىر. كەلىسسوزدەر جۇرگىزۋ مانداتىن ەۋروپا وداعىنا مۇشە مەملەكەتتەر ماقۇلداپ، ەۋروپالىق كوميسسياعا ۇسىنعان.
«بۇل كەلىسىم بويىنشا كەلىسسوز ءوتىنىشتى قاراۋ مەرزىمىن قىسقارتۋ، تالاپ ەتىلەتىن قۇجاتتار ءتىزىمىن ازايتۋ، ۆيزا تولەمىن ازايتۋ، قولدانىلۋ مەرزىمى ۇزاعىراق بىرنەشە ۆيزا الۋ مۇمكىندىگىن كەڭەيتۋ، سونداي-اق، ءوتىنىش بەرۋشىلەردىڭ جەڭىلدىك ساناتتارىن ەنگىزۋ سياقتى شارالاردى قامتيدى»، - دەپ جاۋاپ بەردى س ءى م.
سىرتقى ىستەر مينيسترلىگى كەلىسىمگە قاشان قول قويىلاتىنىن حابارلاعان جوق. ناقتى كۇنى ەۋروپا تاراپىمەن كەلىسسوز اياقتالعاننان كەيىن انىقتالادى. وزگەرىستەر تاراپتار ىشكى راسىمدەردى ورىنداعاننان كەيىن كۇشىنە ەنەدى.
ەسكە سالايىق، بۇعان دەيىن ەۋروپا قازاقستاندىقتارعا ۆيزا بەرۋ ءتارتىبىن جەڭىلدەتۋى مۇمكىن ەكەنى حابارلاندى.
ەۋروپا وداعىنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى -ەۋروپالىق كوميسسيانىڭ ۆيتسە-پرەزيدەنتى كايا كاللاس ەۋروپالىق كوميسسيا مەن قازاقستان اراسىندا ۆيزا بەرۋ ءتارتىبىن جەڭىلدەتۋ جونىندەگى كەلىسىمدى بەكىتۋ ۇدەرىسى باستالعانىن مالىمدەدى.
Massaget.kz
