قازاقستاندىقتارعا KEGOC اكسيالارىن ساتىپ الۋ ءتيىمدى مە
«KEGOC» ا ق باسقارما باسشىسى ءنابي ايتجانوۆ كومپانيا اكسيالارى قانشالىقتى قىمباتتايتىنىن، قازاقستاندىقتارعا قانداي پايدا كەلەتىنىن ءتۇسىندىردى، دەپ حابارلايدى Kazinform اگەنتتىگىنىڭ ءتىلشىسى.
«KEGOC» ا ق اكسيالارىنىڭ قۇنى وسەتىنىن ايتقىمىز كەلەدى. قازىر ءبىز اكسيالاردى 1482 تەڭگەدەن ورنالاستىردىق جانە تالداۋشىلاردىڭ بولجامى بويىنشا ولاردىڭ باعاسى 1817 تەڭگەگە دەيىن ءوسۋى مۇمكىن دەپ بولجانۋدا. ياعني، شامامەن 20 پايىز ءوسىم بولادى. سوندىقتان ءبىزدىڭ ازاماتتار اكسيا قۇنىنىڭ وسۋىنەن جانە ديۆيدەندتەردەن پايدا تابا الادى. وسى كەزەڭدە ءبىز ەكى رەت ديۆيدەند تولەيمىز. بۇل شامامەن 10-11 پايىز كىرىس اكەلەدى. وسىلايشا، ازاماتتارىمىز الا الاتىن الدىن الا جيىنتىق تابىس - شامامەن 30-35 پايىز دەپ بولجانۋدا»، - دەپ ءتۇسىندىردى ءنابي ايتجانوۆ.
2-8 قىركۇيەك پەن 2- قاراشا كۇندەرى قازاقستان قور بيرجالارىندا اكسيالاردى قايتالاما ورنالاستىرۋ (SPO) كەزىندە قازاقستاندىقتار 15 ميلليارد تەڭگەگە 10258502 «KEGOC» ا ق اكسيالارىن ساتىپ العان جانە بارلىق سۇرانىس قاناعاتتاندىرىلعان. بۇگىن-ەرتەڭ ولاردىڭ شوتتارىنا وسى اكسيالار اۋدارىلادى.
«ءبىز قازان ايىنىڭ باسىندا جازىلىمنىڭ باستالعانىن جاريالادىق. SPO داعى باستاپقى باعا 1482 تەڭگە بولدى. بۇگىن تاڭەرتەڭ «KEGOC» ا ق اكسيالارىنىڭ باعاسى 1582 تەڭگەنى كورسەتتى. قازىردىڭ وزىندە 100 تەڭگەدەن قوسىلدى. ەگەر، شامامەن 2- قاراشاعا دەيىن 100 اكسيا ساتىپ العاندا، بۇگىنگى كۇنى وسىمنەن 10300 تەڭگە تۇسەر ەدى. ديۆيدەندتەر كىرىسىنە كەلسەك، ول پايىزدىق قاتىناستا ەكى تاڭبالى ساندى قۇرايدى. مەنەدجمەنتتىڭ مىندەتى جانە قور رەتىندەگى ءبىزدىڭ مىندەتىمىز - بولشەك ينۆەستورلارىمىزعا ينفلياتسيانى جەڭەتىن، ياعني ينفلياتسيادان جوعارى بولاتىن ديۆيدەندتىك كىرىستى بەرۋ. بۇل ينفلياتسيادان جوعارى ديۆيدەندتىك كىرىس ارقىلى اقشانى ۇنەمدەۋ قۇرالى. سونىمەن قاتار، اكسيالاردىڭ ءوسۋى ءۇشىن ىرگەلى الەۋەت بار ەكەنىن كورىپ وتىرمىز»، - دەپ اتاپ ءوتتى «سامۇرىق-قازىنا» ا ق باسقارما ءتوراعاسى نۇرلان جاقىپوۆ.
ايتا كەتەيىك، «سامۇرىق-قازىنا» ا ق جانە «KEGOC» ا ق 28- قىركۇيەك پەن 2- قاراشا ارالىعىندا وتكەن قازاقستان قور بيرجالارىندا اكسيالاردى قايتالاما ورنالاستىرۋ (SPO) قورىتىندىسىن جاريالادى.
ينۆەستورلاردان جالپى سوماسى 34,8 ميلليارد تەڭگەدەن اساتىن 50 مىڭنان استام ءوتىنىم تۇسكەن. بۇل ورنالاستىرۋدىڭ جوسپارلانعان كولەمىنەن 1,5 ەسە ارتىق.
